ADHD食葯問題...請賜教...(急!)

~仔仔媽咪~

查實我想問D葯係咪越食越多架? 我仔本身食咗一年ritalin,都只係每次半粒,每日兩次,啱啱半個月之前醫生俾多劑我仔食,變咗係每日三次,話方便我教仔讀書喎...

但我仔之後既日子,,,情緒變得唔穩定,之後我又教訓佢要佢唔好再打人,個仔為咗令到自己'乖',佢有一星期自己偷偷地去食過量囉,明明每次半粒,佢食咗至少兩粒份量,初時我係唔知,到有次佢响學校當眾咁食咁多份量,俾班主任斷正,我至知有件咁既事,,,我唔知係咪佢食過量令到佢身體適應咗重D既劑量,呢幾日佢係咁出事,直至啱啱嗰星期一,佢放學唔知係咪葯力過咗(應該係,佢中午食,三點半放學),佢同同學爭執,佢用垃圾桶蓋掟同學,結果同學穿咗頭同下巴傷埋,,,

我頂唔順喇,,,呢幾日我都思考緊好無叫醫生開concerta俾佢,至少係長效葯,唔駛佢中途又要補,同埋都可以捱到响學校既時間唔癲...但我又怕佢依家十歲仔,小學三年級,已經開始加重劑量轉concerta,日後會越加越多,加到盡concerta最重嗰劑量,到時都適應埋咪大鑊?同埋又好擔心佢長期太依賴隻葯,日後佢會濫葯...(我都知自己越諗越多),,,查實依家轉concerta會唔會有問題呢?定係捱多陣先?嗰D無胃口唔高唔矮嗰D副作用我係唔驚,只係驚影响到個仔日後個精神問題,講真,我係覺得佢依家同之前斬死細路個癲佬係完全無分別囉.(無計...依家我正面唔到去思考...)

但我真係好辛苦,唔想等到個仔整死咗人地仔女時,我至黎同個仔癲(基本上依家我都受唔到,好想個仔死)...自問我呢十年都仆心仆命去教佢唔好打人,但鬧極打極講極教極用盡所有方法,佢都係咁.

~仔仔媽咪~

出事後呢幾日我都無俾個仔番學,費時佢臨考試又黎整多幾劑大既俾我受...依家仲諗緊下星期考哂試後,仲俾唔俾佢番學...定係留低佢响屋企,我教佢讀書好過?我唔係逃避,而係唔想佢真係殺咗人地個仔.呢次已經打爆咗人地個頭喇.

~仔仔媽咪~

原帖由 leeamen 於 09-6-5 10:29 發表
轉吃concerta並不等如增加劑量，應該是要相應ritalin的份量來服用的，只是延長了服藥的有效時間。

一般來說，服concerta能使學童在學校的整天也保持較平穩的表現，因為不會在中段時期出現wear off 及rebound 現像 (即所謂的 ...

似乎我真係要俾個仔食concerta好D...我都係咁諗,番學時候俾佢食concerta,放假响屋企有需要時至俾半粒ritalin(基本上屋企佢除咗HIGH D,我都係控制得到佢)...但想知您係咪都係响政府兒童精神科醫生度搵concerta?我朋友都係,但佢都係收我朋友十蚊一次葯錢,反之我之前問過我仔第二個醫生(我仔呢一年已經轉咗四個唔同醫生睇佢)猛話政府無呢隻葯,要自行攞醫生紙購買,但出面講緊係廿幾蚊一粒...自問我經濟狀況又似乎負擔唔起...

唉...查實我已經唔知個仔究竟諗緊乜...一方面我都覺得佢係有壓力,都知佢次次打人都係因為同人爭執,人地話佢係傻仔係痴線,佢就打人,,,但呢D唔係打人既籍口黎嘛!even我地大人响街同人嘈,都唔會諗到要打對方啦!呢個星期我都唔俾佢番學,但佢無番學第二日已經扭計係咁話要番學,我話佢打人所以唔俾佢番,佢都好大反應下...實情佢又似乎又鐘意間學校噃...今日我同佢講轉校,佢都話要讀番呢間學校唔肯轉...但實情佢既問題都係局限於學校嗰度,屋企我自問無俾壓力佢,佢有大量玩具,之前每日都有玩樂時間,佢响我面前又表現係開開心心古靈精怪既...實情,我都唔知响邊part出問題,自問自己咁多年真係好用心出盡心力去教佢,個心全部都向住佢,但結果無回報不特只,仲要係負數...咁我都只係唔想佢再打人同整親人啫...就係咁多,讀書佢有學障,查實我都唔會迫佢攞高分,只係要求佢測驗考試會有嘗試去拎本書黎溫,我已經讚佢.唔係想佢做天才囉,只係想佢做番一個正常既平凡人.只係咁.

~仔仔媽咪~

原帖由 jacob614 於 09-6-5 18:16 發表
仔仔媽咪
我仔11歲，食concerta足兩年，據我所知係要醫生紙係藥房買，間間藥房價錢唔同，要格價，如果你仔有自已加藥既情況出現，我諗真係要食concerta會好d，我自已就每日朝早返學前比佢食，無藥過佢手.
慢慢來，可以幫得小朋友幾 ...

多謝您!

查實噚晚我真係好辛苦,成個人都好唔舒服咁...個腦不停去諗番嗰件事甚至再之前嗰D事,又諗到好灰唔知仲可以點教個仔幫個仔,好驚佢大個咗會係殺人犯....幸好噚晚半夜有個朋友成三點半打黎同我傾,又俾咗好多意見我,我至舒服好多,,,至少都好似仲有方法去幫個仔.

我諗住下星期個仔考埋英文就搵醫生要求提早覆診(因為之前約個期係八月尾),到時我都會要求醫生開concerta佢食,我有朋友個仔係crossover咁食,番學食concerta,放假食ritalin,我都想咁樣做,希望到時醫生肯俾我地咁樣食葯啦.

查實大家有無聽過群育學校?噚晚我朋友介紹我俾仔轉呢間,呢間人又少,而且全部都係過度活躍同行為情緒上有問題既小朋友黎,查實之後我上網睇咗其中一間學校資料,我都幾鐘意,但之後同老公講番,佢就好反對囉...我老公公司之前黎咗一班過度活躍症既青年黎試工(唔記得係咩計劃,俾佢地去人地公司做十四日,睇下人地公司請唔請嗰隻),又係有個社工帶住,但我老公話佢地嗰班'細路'响嗰十四日係完全失控囉!都係會成日成班周圍走周圍擒,又係成日互相指駡話大家係癲係痴線係傻,鬧鬧下又是互掟野,又鬧又喊咁...結果我老公一個都唔肯請...我老公話俾嗰D過度活躍症小朋友group埋一堆咁番學同成長,會係物以類聚囉,會互相影响,結果反而更加嚴重...我都好迷惘...唔知有無家長既小朋友係讀緊呢類學校?實情情況係點,好定唔好...?

~仔仔媽咪~

原帖由 Noemie 於 09-6-5 18:18 發表
Please do not give up! It might have some solutions. Please check PM.

收到您PM喇!多謝您!

~仔仔媽咪~

原帖由 77777 於 09-6-5 23:18 發表
仔仔媽咪,

我幫唔倒d mud, 不過, 我諗如果你打返去你阿仔睇開個間, 佢地可能可以比你阿仔快d返去睇, 同時, 可以同個醫生商量返個劑量, 同時個d護士都比較有experience,  我自己有時都會打比佢地問野架, 有時係管教 ...

我今日都試我朋友叫我既方法,俾我仔食一粒(原本每次半粒),我都想睇番佢食多倍份量會係點,暫時都OK啦,溫書都好定好安靜,見佢又無話有咩副作用,我諗下星期佢番學考試我都係俾夠一粒佢,食完至番學...

有時我都好迷惘,查實我好知個仔次次打人都係因為人地話佢激佢,佢至發癲,但始終佢打人真係唔啱,有時去到呢D位我就好迷惘...我班朋友甚至老公都話'係人俾人咁激法,實嬲到爆燈啦...比着我都想打佢地....大人都未必控制到,更何況細路...',噚晚同我傾電話既朋友叫我唔好將所有野推哂落自己身上,但講真我仔係打人嘛...我都好同情我仔,知佢都忍得好辛苦...亦知佢地間學校既學生並非善類,有時我遇到佢地嗰D說話我都好火囉,,,但同時又嬲個仔打人,好憎個仔成日打人、整親人...實情,我應該向邊個方向諗至啱...

~仔仔媽咪~

原帖由 77777 於 09-6-6 07:01 發表
你有無同個老師講返個情形, 首先你同老師表白自己個仔打人有唔岩, 不過, 如果d同學仔把嘴係亂咁講野, 老師亦有責任指出小朋友的錯處, 加以糾正....起碼比阿仔睇倒佢如果比同學仔挑釁, 如果佢向老師提出, 老師會處理. ...

就係之前已經講過,但無計,間學校基本上位九成都係呢類學生,我唔知係我仔問題定係依家間間學校既學生都係咁欺善怕惡啦...之前我都同過唔同既老師甚至校長講過,佢地一係replied我話無件咁既事,反而話係我仔好似有妄想症咁以為同學蝦佢講佢笑佢,佢就打人;再唔係個校長都可以話,你個仔都唔見得係好架咋...;一再唔係直頭答我:"你無可能控制到人地把口講乜囉!"...所以我都無再講,淨係叫我仔去避去忍去搵老師,,,

查實呢次有部份老師都sense到我仔係俾人'了'先至失控,臨尾我坐响度喊,個仔又喊,老師都係同我仔講:"人地撩你,你又唔話俾老師知,你又打傷人地喎,變左係你唔啱,俾老師罰,咁你咪中計囉!"

同埋又講真依家呢個社會複雜咗,呢刻或者係俾佢鍛鍊自己既地方,如果呢刻我處處幫佢,我怕我地呢班仔大個咗離開學校出黎社會時,會仲容易火爆同唔識處理事情囉.我唯有可以咁樣諗.

唉...查實你教既方法,我又何嘗未試過咁同個仔講過,以上你教既每一句,我呢十年已經重複咗無數次,噚日我又係咁講,個仔又係公式化咁去聽,但我又深知講咗都無用,佢都係繼續出事,所以我依家只可以諗加葯.唔駛煩,寧願佢食葯食到呆滯都好過佢周圍打人整親人.

~仔仔媽咪~

原帖由 fungfungmami 於 09-6-6 14:33 發表
題外話..請問你仔仔間學校係邊間？

你係搵邊區學校?我仔間學校响油尖旺區架...實情只要你仔唔會打人或整親人,大多數既學校都會接受到既...正如當年我仔其中一位班主任講,如果我仔唔打人仲要係成績好,校長一定會好鐘意我仔...聽到呢句我更加明解囉.

~仔仔媽咪~

原帖由 當媽 於 09-6-6 16:50 發表
很對不起,只略看前文,但也想回應!如有答錯咀,請多多包涵!

孩子在校自行食重藥事,請小心處理,因此舉:明顯地他是想處理或害怕自己的問題,卻用錯了方法,你一定要處理,免他日後有濫藥問題,真的,此事不可疏忽!
建議你:首 ...

查實早個幾兩個月之前都係一直將中午嗰劑葯交託俾我仔班主任代為餵我仔服用架...但無奈班主任自己本身都太多活動纏身(做童軍leader)同埋有時遇啱佢番唔到學校甚至請咗假,當日中午我仔仔就無人俾葯佢食,結果有幾次都係因為無食中午嗰劑,結果又出事~~~所以我至袋定個葯盒俾個仔自己番學食...之前我唔小心囉..以為個仔唔會食多,點知就係食多咗...就係因為佢想自己乖...當時我又係做錯多樣野,一知佢食多咗好多,我即刻鬧佢,我叫佢唔好完全靠哂隻葯黎等自己乖,我叫佢幾時都要學下自己控制番自己...總之鬧咗好多野...


轉校查實學校無講過要我仔轉,只係我朋友強烈地要求我仔轉校,因為佢覺得我仔間學校唔好,同埋佢本身都有ADHD既仔,佢依家都幫佢囝囝轉群育學校,所以佢都叫我轉,但講真,轉得去邊...再者我同我老公暫時都唔諗轉去群育學校,但其他學校根本唔會收我仔,一黎情緒行為有問題,二黎我仔成績太差...但唔轉又怕會唔會又害咗個仔...咁講真,今年我囝囝班老師個個都好有心機教我仔,連老師自己放工都不忘打電話提醒我個仔幾時測驗默書,默咩範圍,同欠邊D功課...個仔默書合格又會專登打黎報喜,又叫我唔駛咁擔心云云,實情去除我仔呢幾次事件,查實今年我同學校老師關係好好...話佢地唔理我仔,我又唔覺係囉...但無奈我真係頂唔順佢學校班學生..講真,佢地真係欺善怕惡,連外表純良易受傷害既同學,都可以立心專登黎蝦我仔(呢d係我親眼見,但無講俾學校知,費時啦,人地覺得嗰個係好仔黎,我講仲邊有人信,自己個仔咁)...但同時自己又會覺得學校都係社會既縮影黎,越早俾佢去面對,可能到佢大個仔時反而易於處理呢D人和事...所以我真係唔知道究竟點做至啱定錯....

concerta我一定要個仔轉呢隻架喇...


確實經濟方面我都唔係好得,或者到時真係轉食呢隻葯時,我暫時又係問外家借錢,等個仔食完隻葯明顯穩定番,無再打人時,我至番工黎應付呢D葯既開支...


無計...再係咁真係困獸鬥,我老公基本上EQ都唔太好,實情個仔既問題係同爸爸一樣,我老公唔可以理智冷靜去處理呢堆問題,就咁早兩日同佢傾話有朋友介紹群育學校,佢已經可以情緒失控到四點幾走去落街買煙食,又大力打張枱,顯得好燥好煩...但我只係講有間咁既學校for我地班仔而已...我都未決定亦未去深入了解,已經搞成咁!所以我唔親自同學校溝通唔得,否則交俾爸爸,結果我回家係要對住兩件ADHD行為情緒有問題既兩父子...唔想將問題變double囉.要我老公教仔,佢唔教壞個仔或者整到個仔更癲,我已經多謝佢喇.

~仔仔媽咪~

原帖由 ~仔仔媽咪~ 於 09-6-6 17:41 發表


查實早個幾兩個月之前都係一直將中午嗰劑葯交託俾我仔班主任代為餵我仔服用架...但無奈班主任自己本身都太多活動纏身(做童軍leader)同埋有時遇啱佢番唔到學校甚至請咗假,當日中午我仔仔就無人俾葯佢食,結果有幾次 ...

同埋暫時我唔俾個仔番學,都唔係任意俾佢响屋企歎世界,每日所有時間我都係要佢溫書抄字溫考試...都係去我朋友間中心度溫習同埋我朋友都幫手教訓個仔(我朋友教開特殊小朋友)...唔俾佢掂任何玩具,我講明佢掂親任何玩具或VCD我即刻丟...結果我仔呢個星期從未掂過玩具,休息時頂多都係睇益智書.

查實我都明會有唔好既影响,但暫時我仔仲係好鐘意好想番學,星期一件事發生,星期二開始唔俾佢番學,星期三已經扭計話自己想番學,求我地俾佢番同相信佢唔會再打人,,,查實暫時我都唔太擔心佢會逃學或離家出走呢D野,始終我仔嗰隻ADHD係笨嗰類,唔似得我幾個朋友嗰D仔咁smart成日諗計激媽咪做曳野...

不過依家都仲係諗緊考完試仲俾唔俾佢番學,因為都想佢冷靜,我都需要冷靜,同埋我都想利用番呢D時間去教佢其他野...只係擔心咁樣,會唔會反而'縱壞'間學校,有咩時都叫我仔停課...

~仔仔媽咪~

原帖由 當媽 於 09-6-6 22:13 發表
對不起，不吐不快，要介紹一個名詞--『源生家庭』，應清楚明白到，當一件事情發生時，所產生的判斷、看法、反應和處理等….，都是取決於從前累積下來的經驗，而這些經驗大部分是來源自生長的家庭，所以，建議在借錢買藥前，照顧者請做好 ...

查實呢個道理相信每位家長或父母都好明白,但坦白講確實用唔到落我地ADHD孩子身上.

查實做人道理、待人處世既道理,我地呢班仔好多都好明白亦知道,但佢地知道唔代表佢地有能力去做到,正如醫生所言,我地ADHD小朋友正好比一架沒有剎車制既車,唔係佢地唔想剎制或者唔識得剎制,而係根本無呢個制俾佢地踩停自己,得去油嗰個制,咁又點樣叫佢地唔撞埋落山度呢?

根本無家長願意小朋友去食葯,就係因為咁,一直以黎我地呢班家長都好仆心仆命去教,搵好多方法去幫個仔等個仔可以自己控制到自己...嗰時我都曾經每月萬三蚊咁俾個仔去私家度做感統同思維訓練,坦白講,真係可以代替到食葯,嗰年我真係唔駛勞氣教仔,但無奈錢係有限,無錢繼續支持我仔响私家度做治療,政府又無咁既資源,自己同個仔去做感統亦都有限公司(一黎地方問題,亦仲有其他因素)...結果個仔又是打回原形,有時小朋友既行為唔係單單源於家庭,始終佢地所接觸既世界唔係淨係屋企同父母囉.如果可以簡單地講小朋友既行為情緒係源於父母/家庭,我諗,ADHD呢個症同學名唔會產生.亦唔會有咁多家長每日每時每刻都咁頭痛咁辛苦.

食葯係迫於無奈既事,唔食個仔一定更易出事,我响屋企可以完全掌管控制個仔既行為同情緒,但個仔响學校讀書,我唔能夠跟佢上堂番學,一整天既時間佔咗大部份都係响學校(朝八晚四),放學番黎做完功課食埋晚飯,基本上已經要準備作息(始終我地班仔唔能夠夜訓,無精神仲失控)...就係佢地大部份時間都係响學校度,老師一個對卅幾個學生,實情明知孩子既問題會影响到他人,又會令老師百上加斤,唯一可以負責既就係俾個仔食葯等佢可以容易安定情緒同老師合作,至少佢個人無咁混亂,佢至有機會去思考點去做人.

查實我真係理解你既道理,只係都係嗰句,我地班小朋友係非一般既小朋友,我地班家長為咗佢地可以做番個正常人,查實一直都不斷去搵方法諗方法去教養佢去幫佢.佢地既行為同情緒,大家都知係源於遺傳,呢D係不爭係事實,但代唔代表係父母現在都係咁,唔係囉,事實正正孩子有咁既問題,我地做父母既都為咗孩子而去改變,俾番個正面佢睇,以作身教.

同時唔理個小朋友有無特殊問題,有好多時我都唔認同有人見小朋友做壞事就話小朋友既父母教得唔好甚至唔教,咁講真,小朋友唔係淨係對住父母,學校都有成千位小朋友,朋輩既影响力遠遠超於父母,始終人係需要朋友,就係咁樣孩子既行為絕對唔係單單源於父母或家庭,但父母見到孩子行為情緒上既問題出現時,會即時糾正提點,呢樣亦係必然既事.


暫時我係決定葯一定會轉,但同時唔係淨係諗轉葯就算,我同老公都同時提出多個方法去幫個仔,例如唔再買玩具,只係半年一次,仲要見佢行為良好至會買,玩具、遊戲機、VCD都只限佢假日至可以接觸去玩,但同樣都要睇過往表現作評分,鼓勵佢多睇書黎代替其他娛樂,查實呢樣都係响呢幾日唔俾佢番學時我留意到,佢無再掂玩具,除咗溫書外都只係睇課外益智書,結果佢係明顯心境平靜好多,亦好主動同我地傾番做人既道理,問咗好多問題,亦真係有留心去聽(至少佢會適當時候會回應,係定唔係)...之後同我老公傾番好無考試完結後繼續俾個仔停學,我地見個仔真係好期待可以番學,好鐘意番學(呢樣係個仔噚晚同我講),但同時我地又想佢有多D時間去思考去學習點去面對欺凌同負面情緒,咁講真,佢未諗到自己點做,就要佢每日去面對咁多同學同社交,要佢處理得妥當跟本係不可能的任務,所以暫時我同老公既結論係,俾佢隔日咁番學,尤其依家考完試後嗰一個月番學時間都唔係教書只係處理班務,就係要好好把握呢段時間俾佢再學習做人處事道理,呢樣我都要同老師、社工傾,但都希望可以實行到,始終,大家都係想幫個仔啫.

暫時諗到呢D,但相信日後仲會更多...到時再上黎同大家一齊研究下啦.

~仔仔媽咪~

原帖由 當媽 於 09-6-7 07:36 發表
再次說對不起,你現在走的路,我從前及現在正走著,你遇到的,你做過的....,從前,我大部分都有做過,別把教養兒子的責任放在他人身上,就算如何如何...,應該用心解釋,注意自己的反應和情緒,囝是自己的,連自己都包容不來,情 ...

查實我係明你所言,唔好放响心度,今朝我都係邊反覆思考你既說話同意思邊回應,可能就係咁又是長篇大論...^^

查實我除咗之前抑鬱曾經叫個仔去死外,咁多年我對住個仔都唔會講任何負面說話...因為就係知佢本身都負面,唔想佢更加負,所以一直我採取的都是正面態度,就算我對學校或老師有不滿,亦唔會响個仔面前表現出黎,莫講話會否講出黎...

只係人心肉造,有時都會有怨言亦對人家做事方法有意見,我覺得呢樣係正常,正如社工所言,感受呢d野係唔可以控制到嘛,但行為可以控制,响朋友傾談時或網上傾心事時,呢d確實係我個人感受同睇法,都係想俾人知我所想,更加易於去一齊研究同令人理解我既諗法多d,至少知我係咩心態去面對呢件事...

儘管我對學校有意見,但總體黎講我還接受到呢間學校,噚晚同老公傾時都講,唔能夠要求學校十全十美,咁講真依家我同學校既關係唔差,今年既老師個個都有心亦主動去教我仔亦主動同我溝通,諗真d實情都已經夠.只盼呢個良好關係可以一直維持.

查實我地每位adhd小朋友既家長,都有自己唔同既故事,但亦都感同身受,查實好似呢件事咁,安慰得最多而且明我最多都係一班adhd小朋友既家長,實情最貼心莫過於此,只係一句鼓勵說話,一句貼心問候同支持,已經撫平我心裡面個大傷口...所以更需要大家互相扶持同鼓勵.

~仔仔媽咪~

原帖由 sinyuma 於 09-6-9 00:33 發表
各位好,我是新入來這個網的,現有一些問題,希望你地可以幫忙. 我的女兒張會去政府的健康中心做心理評估(他們說要做3小時) ,
前後都排左10個月,請問做完評估要等幾耐才有結果出,
如證實是ADHD,是否要再排期見精 ...

其實係要囉!even你見次次俾六十蚊去覆診,個醫生都係講同一句廢話:"幾好吖!下次約你幾時覆診",十分鐘內走得....始終ADHD個症至少跟到小朋友幾乎廿歲,當中佢地一路長大,遇到既問題更多,佢地會更加多情緒同行為上既問題出現,,,所以叫做有個醫生跟進住,有咩事起上黎,至少有個專業人士幫你同囡囡,記緊每次見精神科醫生都要將囡囡D事同問題講俾醫生知,尤其學校方面,如果學校唔方便派位老師跟你地去覆診,可以要求學校老師或社工,囡囡學校發生乜事,唔理大小,都要話俾你知,等你可以同醫生講.咁至可以幫到你囡囡.

同埋嗰D社交小組同行為治療,都係先經精神科醫生度申請,行為治療係心理學家嗰邊做.基本上ADHD無好似自閉咁有咁多支援同訓練,但有兩三樣都好過無,一定要報,唔好拖.

~仔仔媽咪~

原帖由 當媽 於 09-6-7 07:36 發表
再次說對不起,你現在走的路,我從前及現在正走著,你遇到的,你做過的....,從前,我大部分都有做過,別把教養兒子的責任放在他人身上,就算如何如何...,應該用心解釋,注意自己的反應和情緒,囝是自己的,連自己都包容不來,情 ...

查實之後我都get到你想講乜...查實你唔好誤會,,,或者你不妨先細閱我呢個topic我所有回應,消化咗,再作回應比較好.查實我都一直sense到你係只睇其中一兩個回應黎回應我,所以有少少唔搭上大家彼此頻道...^^

講真大家都有小朋友既,理應都好知,孩子既行為思想,並唔係單單源自家庭同父母...佢地未上學前仲可以咁講,因為長期都係對住父母,但當小孩升到小學,就唔能夠將小孩子一切既行為同情緒上既問題完全歸究於父母,這確實對父母極之不公平,不論那孩子有沒有特殊問題,但佢個人問題,不能一口咬定是父母身教不好,令孩子學壞,心想,我堅信呢個世上係無教壞仔女既父母囉.

好似我仔去學校學hockey,查實嗰次我係專程俾個仔食咗葯後再同佢一齊番學校睇住佢去學,去觀察留意佢,事先我當然先訓話佢,要求佢依足教練指示去行動,唔准打人或嘈交,有咩事立即同教練講,唔可以私底下解決,結果我仔查實嗰堂完完全全係好守到規矩,又無犯事,反之當分兩組進行練習時,其他己學一年既師兄嫌我仔太笨手笨腳(我仔推波推得好慢好無力),結果佢地一見輪到我仔練習時,就專登踩住個波唔俾我仔打(曲棍球係用棍打球),仲要呢樣動作佢地係重複咁做,我仔忍咗佢地至少五六次都唔出聲亦唔反抗,我亦無幫仔任何野,反而我係靜心企响球場邊觀察我仔既反應同佢會點樣做,之後羊群效應出現了!有位同我仔同班既同學,一直係文靜乖乖仔,細細粒好受人保護,佢見組內嗰班師兄用呢個方法去阻止我仔去玩,佢就跟住做,個波滾到佢腳前,佢即刻拎起唔俾我仔玩,結果我仔崩潰,忍喊忍到眼同成個臉都紅哂,但又唔出聲好無助地望住我,我就知我仔已經去到極點,佢已經唔知仲可以點做,連忍讓都做埋但結果都係受到欺凌.

結果我要求個仔唔好向我求助,我話呢個球場同呢個訓練班係教練哥哥話事,我要個仔自己親自同教練講,結果我仔就算好驚,但都照走埋去搵教練,但佢一開聲已經哇哇放聲地喊,完全講唔到野,咁我至介入同個教練講,佢地嗰班小朋友專登踩住個波同拎起個波唔俾我仔玩.跟住個教練都捉哂佢全組人黎訓話.

查實當中有份欺負我仔嗰位同班同學,佢本質唔壞,但人總係會有羊群心理,亦因為人需要朋友,自然會學識咩叫埋堆,even我仔咁笨咁呆咁不問世事既小朋友,佢今年都識得以上呢D野,亦試過欺負同學,但係咪我或者老公有欺負人?問心,無囉!咁欺負人呢樣野從何而來?源於家庭?所以呢樣唔可以一句打天下,可以萬事都可以用呢句道理黎套用去講囉.

所以根本唔係賴亦唔係推卸,如果係,我地呢班父母絕對唔會教仔囉,推個責任俾人地,話係人地教壞,唔關我事,咁明明唔係我都推咗俾人地先,咁我又何需再勞氣再教?

好似噚日同我朋友傾開一位家長,個仔有ADHD,之前有俾個仔食葯,但食到小五時,以隻葯令佢仔瘦為由而停葯,結果佢仔即時打回原形,開始番學打同學,之後又試過要求媽媽俾佢用架買餸車黎撞人,我朋友同其他家長全程O咀,初時呢位家長都有'好溫柔'地同個仔講話唔好咁做啦...但個仔係都話要攞車撞人,結果呢位溫柔的媽媽答應咗個仔:"好啦,俾你撞一下啦!細力D噃~"結果個仔好快樂地用車大力撞前面家長一下,記住係大力咁撞,而唔係佢媽媽提點佢既細力囉!但呢個行為同態度的確好令人側目...個家長每次出事後既理由都係用同一句:"我仔有ADHD,咁呢個症係咁架啦!佢都控制唔到/佢都唔想架"係咪可以用一句黎打天下?ADHD無自控能力,但代唔代表母親都一樣無自制能力?囝囝要求用車撞人一下,根本一個無理既要求,就算知佢呢個要求係源自ADHD呢個症,但代唔代表可以唔教唔去制止呢?只可以慨嘆呢位家長既態度同行為,已經嚴重影响埋其他同樣有ADHD小朋友既家長.難怪會有人成日話我地呢班家長唔教仔,話我地班小朋友有爺生無乸教.原來如此.

所以,唔可以死用一句道理或一種想法黎諗所有人和事,呢D道理同想法都只係前人自己遇到某種人和事而有感而發囉,我地可以拎黎做自我警愓,但唔可以拎黎睇哂全世界,始終我地遇既事會唔同,小朋友每個特性都唔同,even大家都係ADHD,但都可以好似萬花筒咁變化莫測.我仔衰打人無EQ,我朋友個仔衰講大話同駁咀,另一個朋友個仔衰偷野癮、講大話、咸濕加打人,我仔班同學,一個鐘意記仇,一個鐘意投訴大人同打人...佢地每個都係ADHD小朋友,但已經係個個唔同,我可以食住我仔,但唔代表我可以控制到人地個ADHD小朋友.

~仔仔媽咪~

原帖由 77777 於 09-6-9 14:16 發表
仔仔媽咪,

其實好感覺倒你好用心咁教仔, 不過有時我地d仔如果真係有超人的自制力, 就真係mud野問題都無啦......

而家d小朋友有d真係naughty左好多, 好鬼多口, 又鍾意"ha"人, 所以我都好驚阿仔會忍唔倒, 有時發現 ...

查實...唔知呢...係我怕事吖定係知自己個仔又係成日俾人投訴唔見得好人地幾多,我至唔出聲吖定點,我真係好少講俾老師知,始終我仔學校幾乎全校都係D無禮貌既學生,有禮貌的只佔少數,我仔讀嗰班又係全級最差嗰班(二年班已經有童黨,訓導主任爆俾我知的),我仔幾乎日日都會俾人'了'佢幾野,有次同個仔出旺角,遇到佢同班同學,佢地兩個都係為咗睇遊戲機而黎(咪有間百老滙係地庫黎既,佢地成日專程去睇人打機),我遠處企定定睇住我仔(驚我仔整親人),全程個同學一句痴線前一句低能弱智傻仔後咁稱呼我仔話我仔,差在未叫我仔死開D...但都差唔多意思,我仔係全程無反應又麻木哂,以前一二年班比着佢聽到人地嗌佢做傻仔,佢已經好激動喊定先,就算唔喊出黎,都會望住我,睇我有咩反應(搏下亞媽會幫佢口鬧人地個仔嘛...D小朋友好興搵父母代佢地出頭架啦),,,

睇您覺得好定唔好囉!講真自己教個仔,個仔又唔會下下都聽或者即時改正到,更何況人地細路...我會覺得呢刻個仔仲細我地仲可以幫佢護佢,見邊個蝦佢就幫佢出聲,但之後呢,,,?我地仲可唔可以護個仔一世呢?我覺得嗰D蝦我仔既人响呢個社會隨處都有,仲越黎越多,講真我地唔可以拍心口FIRM人家呢D細路大個咗會唔會變番一個正直既人囉,難保佢地日後都係咁恰比自己弱既人,到時我仔大個咗出黎社會工作,又係遇埋呢類人,咁佢唔識去面對去調節自己情緒同諗法,咁佢仲有無人護佢代佢出聲或者幫佢呢?

我係嗰D少少野都諗到好詳細既人黎架,所以我會經常失眠,好似以上呢D,查實連學校部份同我地相熟既老師都話佢地係知佢地學校班學生有幾曳,但查實學校就係未來社會既縮影黎,唔係依家社會既縮影,而係未來,因為未來既社會係由我地呢班細路去經營去創造,依家呢刻我地呢班友仔仲未應付處理到呢班人和事,日後佢地成人後同樣一樣處理唔好...所以我都同自己講,唔好幫咁多,反而當係一種訓練模式黎,咁佢地遲早都係要面對要學識點去解決架啦...如期係咁,不如趁依家佢地唔駛番工又無經濟壓力同負擔時,用依家學習既黃金時間黎學習呢D仲好.但呢D亦同時需要多方面既野黎配合一齊去做囉.

呢幾日我真係幾多諗頭,我朋友話我買咁多野for個仔暑假時我教個仔去學去練,係無謂兼side錢同無作用...我覺得唔好响未試前就打定輸數囉!佢地係粗心大意,係無耐性,但唔代表唔需要改善囉!佢地無耐性咪要搵方法黎練番耐性黎囉,所以我至咁變態要個仔考完試要跟我學玩摺紙同埋素描呢D咁細微又靜態既野,我仔有樣好就係唔敢反我,我同佢講到明無得話唔玩,一定要玩,仲要聽足依足媽咪指示去學去做...我仔暫時無異議...但預咗佢到時又話唔好玩或者覺得悶...希望到時我同個仔都堅持到啦.

呢幾日我老公都似乎幾有心機約個仔食晚飯前落街打籃球,暫時都只係互拋波,未學正式玩法,但都係一個好既開始啦...都希望佢地兩仔爺可以KEEP到繼續晚晚打波.


同埋今日放學都幾開心同感動,,,上星期一俾我仔打穿頭既同學仔,今日放學親自請咗一包蝦條俾我仔食,我覺得好明顯係同學仔媽媽教仔有方,好正面,我即刻同個仔講,人地俾你打到穿頭咁痛,但都可以咁快原諒你仲請你食野又對住你NICE咁笑,呢D係對你真心既朋友黎架!人地對你好,你就要好好珍惜,唔好因為自己脾氣要一手打走哂對自己好同鍚你既朋友囉!仲有講好多(你都知我幾長篇大論架啦)...等我又叫個仔學下野,聽日要我仔親自回禮多謝呢位同學仔啦...始終人地可以咁寬容去對待我同個仔,呢個心已經令我好感激!

~仔仔媽咪~

原帖由 ~仔仔媽咪~ 於 09-6-9 17:35 發表


查實...唔知呢...係我怕事吖定係知自己個仔又係成日俾人投訴唔見得好人地幾多,我至唔出聲吖定點,我真係好少講俾老師知,始終我仔學校幾乎全校都係D無禮貌既學生,有禮貌的只佔少數,我仔讀嗰班又係全級最差嗰班(二年 ...

睇漏咗添...查實玩具我仔都係多到一屋都係,就係D玩具多到响屋企行到邊都梗有幾件响左近,我仔都可以忍到唔掂唔玩唔犯規,我覺得查實只要佢地有HEART,其實係可以控制到自己囉,不過係差在用咩方法黎激發佢呢個HEART去控制到自己唔再打人...呢下實在令我好頭痛...!!!講真我仔唔再打人,佢其他問題根本已經唔係咩大問題黎,基本上讀書我又管到佢,佢又從未駁過我咀亦唔敢鬧我,我要佢做既事佢又做到,只係無專注,成日游咗出公海...但呢D我係接受到,唯獨是完全接受唔到既就係佢打人同成日唔小心整親人...只要佢改到唔再打人整親人,我真係咩都願.

~仔仔媽咪~

原帖由 77777 於 09-6-9 19:49 發表
仔仔媽咪,

其實每個小朋友都唔同, 而佢地的媽咪都係最熟悉佢地, 同埋每個人都有唔同的方法, 你一定知道邊種方法先最適合你仔仔的....

好登你開心你個仔仔雖然好多玩具, 但佢可以control倒自己唔去玩d玩具, 其實已 ...

係架!查實咩方法都好,至緊要自己清楚自己用嗰D方法係work係理性既,就要堅持囉!始終學你講,就算我地班仔都係ADHD,但永遠都唔會相同,佢地隻隻都唔同style架!

好似我朋友個仔,佢又係ADHD,佢仔永遠無打人既問題,只係好精,有鋪大話癮,會成日鬧媽咪駁咀講大話,所以我朋友都無哂佢仔符.

另一個朋友個ADHD仔,打人、偷野、講大話乜都有,但我呢個朋友真係好睇得開囉!就算依家佢囝囝要上庭(偷咗同學野),但佢都好堅持唔放棄個仔,仲好積極咁搵好多方法去教個仔幫個仔,我呢次俾個仔玩謝咗,佢都可以倒番轉頭好好心半夜三點半打黎安慰我鼓勵我(我响facebook度講哂負面野)...我覺得佢真係一個好稱職既好媽媽.

查實我地應該要向我第二位朋友好好學習囉!唔好俾亞仔D問題打敗,唔好俾佢地D唔好又惡頂既特質打敗,始終學似我呢位朋友咁同我講,個仔唔生都生咗出黎,我地無計架啦,都要去面對去接受同埋幫佢,無可能真係唔理佢唔要佢囉!我地唔理個仔唔要個仔,對個仔有好處咩,我地做佢亞媽會捨得唔要佢咩?我聽完真係醒哂!我朋友講嗰D真係事實黎囉!還掂個仔都已經生咗出黎,事實係有呢個問題煩住我地,咁我地唯有去不斷搵多D方法去幫佢去解決問題架啦.呢D先黎得實際.

我有個朋友都係有ADHD仔,不過同佢傾開,似乎佢處於半放棄態度,當我同佢交流大家教仔問題時,有好多時我地俾好多意見佢,佢諗都唔諗(莫講話有無試下去做)就猛話用唔到落佢仔度或者佢仔唔受...咁我會覺得,你連試都唔試,又唔試下改變一下對仔既態度,咁點至幫到個仔呢?呢樣我都有同我嗰位做中心既朋友(幫開特殊小朋友訓練)傾,暫時我地都仲未有辦法去令我呢個朋友肯去改變態度同嘗試,但希望佢終有一日可以肯去試,始終我都有個ADHD仔,都想大家既囝囝可以快D好番,可以做番個正常人.

我仔溫書都會炆架!但我唔會俾佢打敗,我都會話佢,我直頭同佢講,你依家溫書之嘛,又唔係依家考試,做乜咁炆?你炆住喊住發哂脾氣咁溫書,你嗰D英文字係唔會記到入腦,你聽日考試唔會識囉!我同個仔講,你要容易記到D生字,首要條件就係唔好炆,唔俾自己炆,冷靜D安安靜靜俾心機溫好D書就得喇.我仔即刻會收歛番.但少少炆想喊梗有架喇.我都係邊同佢講邊係咁搵方法搵說話黎試令佢明白,Plan A唔得就PlanB囉,再唔work既,後面仲要c,d,e,f,g...,試到一款啱佢channel為止.反而除咗我仔打人,我會無哂符外,其他我都仲唔認輸,仲同個仔戰鬥落去既...

~仔仔媽咪~

原帖由 ~仔仔媽咪~ 於 09-6-9 20:32 發表


係架!查實咩方法都好,至緊要自己清楚自己用嗰D方法係work係理性既,就要堅持囉!始終學你講,就算我地班仔都係ADHD,但永遠都唔會相同,佢地隻隻都唔同style架!

好似我朋友個仔,佢又係ADHD,佢仔永遠無打人既問 ...

至於學校,我都有諗同佢轉,不過以佢依家既成績同行為,根本無學校會肯收佢,所以呢年我至狂谷佢英文,,,雖則我都有感認為佢轉咩學校都係咁,以往佢讀咗三間幼稚園同依家間小學,佢都係咁樣打人...幼稚園佢打人,個醫生死都話係因為佢講唔到野(三歲半得一歲言語程度),依家佢咁叻講野,但仲打人,呢下我真係唔知轉咗校會唔會好好多...但都心郁郁想同佢轉囉,希望轉到我心目中嗰間學校(嗰位積極好媽媽介紹俾我的),同埋希望轉咗校後對佢情緒真係有幫助...希望啦.

~仔仔媽咪~

原帖由 77777 於 09-6-9 21:29 發表
其實我地d仔係好受d朋輩影響架, 如果其他同學仔無咁蝦蝦霸霸, 乖d, 對你個仔好d, 有禮d.....佢起碼唔會咁燥先啦.....

我阿仔個排比人排斥, 響屋企發晒脾氣, 我先知咋....如果佢唔係好忟, 我都唔會知.....

同埋老師 ...

查實我地咁多位媽咪對住呢班小朋友都係見步行步咋...講真前路係點將來係點真係唔會有人知,就係咁樣我地至每行一步都要諗清諗楚要好小心同埋一定要俾心機去試唔同既方法囉!實情我地教呢班細路仔,我地都同時同個仔成長咗好多,講真,如果比着我生個聰明又乖巧文靜既仔,我諗我仍然都係細路女一名,任性衝動又脾氣唔好既亞媽.我諗呢份係神專登揀選俾我既最好禮物,就係知我都需要長大.

都係架!我都好感恩我今年同個仔遇到一班真心教小朋友又有HEART同耐性既老師,講真佢地連放工撘車都記掛住我仔D野,佢地咁樣無私付出真係好額外既野黎,所以我猶豫唔知好無俾仔轉校都係因為呢間學校都有好多好老師.

同埋我地班仔真係好受朋輩影响,我仔又出奇地零舍同其他有自閉或過度活躍症既小朋友友好...佢老友亦係亞氏保加症加過度活躍,佢地真係會互相影响,有時都唔知好定唔好,連老師主任都話查實都好想我地呢班仔可以多D同正常小朋友做好朋友一齊玩,但無奈,我地班仔又成日整親人,就算嗰D小朋友唔介意,但人地父母未必會接受到個仔成日俾我地班仔傷到囉.所以都好無奈...以前我都曾經試過堅持去幫我仔搵D正常小朋友同佢做朋友,但最後都係因為我仔傷到人,結果人地父母接受唔到,就算之後個小朋友原諒咗我仔主動約我仔搵日上佢屋企玩,但人地父母已經斷絕我地來往,嗰下仲更加傷害到我仔個心,我亦都好傷.因為亞仔一腳,就踢走咗佢同個小朋友既友誼同埋我同人地父母之間既友誼,我又俾人話我唔教仔,縱容個仔去傷人,實情係得不償失.所以依家我都唔再係咁做,都係順其自然啦.

~仔仔媽咪~

原帖由 當媽 於 09-6-9 21:52 發表
我兒現年已中一了,我也曾患抑鬱,但見孩子現在的情況,有些意見想講,

其實,我在這topic回應了幾次,但內容都是簡短~!請問你對我的回應感覺如何?覺得我忠告,是奚落,還是講風涼話或是其他呢?

至於,講兒子社交事,立場是 ...

實情之前我並無惡意,只係覺得你係咪無睇哂我之前所有回應,所有你回應嗰D內容至同我之前所講既咁格格不入,好似真係無睇到我之前所講,只係有呢種感覺.同埋我確實係唔太認同你所言,咁講真,大家一齊交流,當然會客氣,但唔會明明自己唔認同,自己有個人睇法,但都唔表達出黎囉.

但依家見你呢個回應,我反而係覺得你份人太主觀太緊張,唔好將人地既說話諗埋一邊去諗,如果我係覺得你唔係善意,我又何須以幾篇千字文段的回應黎回應你呢?如果你覺得人地會認為你既忠告是奚落,還是講風涼話,咁係咪你自己都覺得自己所講既都有問題?自問我唔覺得你有問題囉,如果你認為有,我就會覺得係,否則,大家同路人一齊去討論去交流,大家都受同樣既苦,唔應該係互相指駡同奚落囉.

如果你講你之前曾患抑鬱,查實我會更加明白你,因為我曾經都為住囝囝既問題而抑鬱過,我朋友亦曾抑鬱過,我朋友係嚴重到需要服葯一段日子至康復,所以我更加明白你既心係點,份人會額外容易緊張焦燥係必然的事,但唔代表任由自己焦燥緊張落去,咁樣對你同囝囝沒有好處.

試下放鬆D去抖一大啖氣,先平定自己情緒,再要求自己冷靜地用平常心地去面對事情,先要求自己唔好向負面方面諗,唔好諗人地一定話你不是或者人地係衰有唔啱,亦唔好先唔好對人或事帶有恨意怨念,試下靜心去聽下人地所講,再冷靜地自己慢慢逐點去分析去消化,我覺得咁樣你會思路比較清析多!自己亦會開心好多.

正如你所言,孩子既情緒同行為係源於家庭,要孩子情緒行為穩定,行既路諗野方法正確,作為父母先自己平定安定自己情緒先,如果自己亦係容易發怒既人,怎能要求孩子不輕易發怒?如果自己只向一邊方向思維諗野,唔多方面去分析去諗,怎能要求孩子不要誤會他人好意,怎能要孩子不去怪責埋怨別人欺負自己(但事實上別人沒有欺負他)?所以你希望孩子怎樣,你亦要怎樣,你希望孩子改善情緒同思維,你亦要改善之.互勉之!