我囝囝被懷疑有ADHD

家希媽媽

囝囝7歲，小一。一直都係好動多言，易玩得失控，專注力唔算好，但仍可以接受。

幼稚園3年，成績一直都保持頭三名。直升上小學，問題開始嚟。學期初已經俾老師投訴三次，有上堂攪住同學仔，玩得太開心整親同學仔..教訓左一輪後有改善，起碼無再收到投訴。到督課班做功課就頭痕，有時撩下同學仔，有時抬住頭遊雲太空，總之人地一個鐘頭做晒，佢要二個鐘。俾督課老師投訴好多次唔專心唔做功課攬住玩.....! 返到屋企我坐隔離陪佢做，佢就好快做得晒。考試測驗每次都有80幾90分，全部都係錯D無厘頭嘅事，好似擦左唔記得寫番，填充題有生字揀可以寫左第二個字(觀察 ->歡察)，數學橫式啱直式都可以寫錯(例如橫式80+20=100, 直式可以係80+30=100)，總之千奇百趣，但老師話佢答案係啱，但寫錯都要扣分。所以成績就落到43人考20名。

平時有得玩仲驚，可以開心到癩晒，又會自己照鏡扮鬼扮馬，人地睇到以為佢傻左嗰種，成日叫佢冷靜D，但一玩起上來就真係失控。

因為有咁嘅情況就帶佢去私人兒科評估，醫生結論係懷疑係輕微ADHD，不過要觀察一年再可以確診。因為佢做評估嗰時可以完全坐定，所以醫生就叫我呢一年留意佢情況，再覆診，。始終確診左就要食藥。我都好擔心，所以我想了解下如果真係要食藥，係咪長期要食?仲有咩方法可以幫助到佢?

多謝指教!

polly0503

我個女都係輕微，3個月覆診一次醫生話食唔食藥我可自己決定，我個女係好多咀，暫未影響人，成績同你個仔差不多我暫時都係諗住再觀察住先。對住個女真係要好高eq。

家希媽媽

回復 polly0503 的帖子

真係，7年我真係EQ都提高好多。起初幼稚園時凈係覺得佢好好動，好似玩極都唔夠，又癲又失控，我教佢都好似癲婆咁。到上小一有明顯症狀，咁我先明白原來佢可能係ADHD。有時我都教到自己都好忟。

polly0503

我好明白你的感受，我每日叫佢做野都要叫幾次，經常都攪攪震，我一向有用獎勵計劃其實都幾有用。如佢有改變我會多讚賞都幾有用。但有時真係好難忍到唔話佢。

polly0503

最忟係叫佢做野要次次都要檢查下佢有沒有完成。做緊第一件事未完成就做第二件事跟住第一件事就完全放埋一邊。

家希媽媽

回復 polly0503 的帖子

係呀~~每日都要幫佢檢查功課，叫佢執完書包，就靜靜雞幫佢核對下有無執漏(因為唔想佢依賴我)，，佢可以執埋D功課出嚟，試過因為咁而欠功課(無做而欠都甘心丫)!

佢又係做做下一樣又走去做第二樣，跟住就無做番，就算玩玩下佢都可以走左去玩得二樣。唯一佢可以堅持到就係睇卡通片，佢可以重覆睇同一套卡通。

係呢，你囡囡依家有無食藥? 食左藥係咪真係好D? 我聽其他人講食左係好D，但藥力一散就回復之前咁，令我覺得好似治標唔治本。

polly0503

回復 家希媽媽 的帖子

係呀! 我個女又係鐘意重覆睇同一套卡通, 唉... 我暫時決定不用藥, 上到二年級再睇情況. 我大女佢間中都會因多咀被罰企,佢會同我講返 , 老師暫時沒有搵過我.

hoveypan

我個仔都係有ADHD，以我個人認為，如果佢的行為未去到動不動便打人，又或者情緒唔係咁失控，就最好唔好食啦。我仔之前食R字頭嗰隻，食時好定同好累，藥力過咗就打回原形。跟住佢食一隻長校力的，要3個月才見校果。我仔食咗薬3年，已經停咗5食。原因係，我接受包容同體諒佢的行為，欣賞佢的口才。接受佢的成績超差。經常同老師討論教法。如果你地可以接受到指看品德，唔睇成績，你地就唔使食藥（暴力除外）ps.真係唔係咁多媽媽接受到自己的小孩年年考最尾，經常見家長。所以，食5食藥要諗清楚。

hoveypan

5記得講，食薬係有副作用的，反胃、漚、冇謂口、瞓唔到、頭痛，最重要係影響發育。

polly0503

請問學校知不知你的小朋友有adhd？

家希媽媽

回復 hoveypan 的帖子

多謝你意見

其實我囝囝只係玩得太癲時易失控，有時(好少好少)真係會發脾氣就癲左咁扔嘢，同打自己個頭，但唔會打人。有時見到佢咁我真係好擔心同心痛，好彩7年來都只係發生過3-4次，尤其近呢一年未發生過，我諗應該佢大個左開始識控制脾氣。

講真，未到要食藥控制我都唔想俾佢食藥，因為我始終覺得係治標唔治本嘅方法，加上就算確定係ADHD，都係屬輕微，所以我都係想用其他方法去幫佢，依家有俾佢食一隻V字魚油丸。


可能佢幼稚園時成績唔錯，到小一跌到咁差，我都緊張架。但見佢測驗考試D卷加上老師同我講，知道佢又唔係唔識，只係錯粗心大意，已經開始無咁緊張佢成績，依家反而擔心佢操行多過成績，因為操行分已經去到C，唉~~

家希媽媽

回復 polly0503 的帖子

學期初收到三次老師電話之後，我依家一見到學校來電顯示我就驚喇

polly0503

學校知道你個小朋有有ADHD嗎？我未講因為暫時情況可控制到遲些就唔知。大家努力。

polly0503

你小朋友間學校係咪好谷埋係傳統學校？我個女果間係傳統學校上堂係要坐定定所以對佢黎講係辛苦，希望佢呢6年可以學習控制下自己。每日放學我會同佢去公園玩陣等佢放鬆下其實都幾有用。

家希媽媽

回復 polly0503 的帖子

我無同學校講有關我囝囝有ADHD，我唔想佢被標籤化，始終只屬輕微，又唔駛食藥，亦無嚴重影上堂運作同同學仔。

家希媽媽

回復 polly0503 的帖子

我囝囝間小學係傳統學校，又係要求坐定定上堂，對於我個仔真係幾辛苦，起初揀呢間學校就係校規嚴(當時唔知佢可能係ADHD)，依家睇番......都有少少難為佢。暫時觀察住佢返學情況，如果真係問題惡化，都會幫佢搵其他學校。

polly0503

我同你的想法一樣。

家希媽媽

我真係好想知道，任性，成日挑戰你底線係咪ADHD嘅症狀？我真係被激到就嚟癲！7歲仔已經咁反叛，我唔識教喇

chanyeehang

我每次睇e度d討論, 我都好懷疑我個仔係咪有?  但係, 我個人認為香港太大壓力, 動不動唔跟大隊就被標籤有問題, 我地細個都冇e d野, 所以大家包容一下, 唔好俾咁大壓力俾自己同小朋友, 我成日都咁同自己講不過都做不到, he he!!!  

加油, 而且隨小朋友長, 我覺得會好轉的, 一樣米養百樣人呀, 大家緊記!!!