教育王國
標題: 有啲後悔無比小朋友讀英小 [打印本頁]
作者: sheepeep 時間: 24-2-22 13:45 標題: 有啲後悔無比小朋友讀英小
本帖最後由 sheepeep 於 24-2-22 14:06 編輯
女兒現在小二，讀有直中的中文小學(學校只有英文科用英文教，與其他同grade小學比較程度偏淺)，幼稚園亦是讀中文為主的學校。
我跟先生英文不太好，無同小朋友英語溝通。小朋友由細到大的語境, 就是靠幼稚園小小net的時間、睇英文卡通、伴讀英文故事書(上咗小學無咩時間伴讀了)、上英文話劇約一年至今、每星期一堂網上net oral上了數個月至今，小朋友現時的英文程度係自行睇到dogman (不過佢唔係成日睇書嗰種人, 現在亦只比較肯睇漫話或攪笑種類)，能講簡單的完整句子(幼稚園時已經講到, 反而上到小學無以前咁放咁肯講)。
以前都一心諗住考DSE, 覺得中文重要, 亦好多人話中文難學過英文好多, 讀中小打好個底再上英中較好。不過近期都考慮比小朋友到外國讀書，當然因資金問題，起碼高中先會送。
另外，越來越發覺，幼稚園如不是讀雙語幼稚園，小學係中小，好難令小朋友能說流利英語，尤其一啲日常用語係睇英文卡通片或故事書都唔會學得到，另外寫英文的機會亦不多(雖然哩個可以靠外補加強)，但都只係有限度，因小朋友較被動又驚錯。
所以真係有啲後悔無比小朋友讀英小，宜家轉又未必咁易轉到(小朋友成績中游)，亦可能要放棄直中。
如果唔諗轉校，仲有咩辧法加強到呢?! 有諗過參加一啲多外國小朋友的sports club，但小朋友很抗拒(因為佢怕輸, 唔想玩啲有輸贏成份的運動)，再者佢比較內斂，不太主動交新朋友/同人傾計。
作者: RainyRice 時間: 24-2-22 14:06
sheepeep 發表於 24-2-22 13:45 
女兒現在小二，讀有直中的中文小學(學校只有英文科用英文教，與其他同grade小學比較程度偏淺)，幼稚園亦是 ...
本帖最後由 RainyRice 於 24-2-23 22:14 編輯
小朋友的直中是英文中學的嗎？既然學校有信心在中小直升上去Band1英中銜接得到，專心做到級頭60%我覺得家長無需擔心，亦沒有什麼需要後悔。如果你打算高中才到外國，到時你已經小朋友在英文中學讀書了。當然可以自己給小朋友多一些English enrichment ，參加英文的課外活動運動外也可以參加camp 那些。識得IS小朋友參加YMCA camps；再唔係直接去參加Trinity英文oral班；可以參加普通英文班 MudPie Chancery 之類；又或者自己去參加朗誦比賽，學校朗誦節，老師應該唔會反對，不用參加什麼班訓練，就是自己在家練習，等小朋友大膽啲要多說多講。
英文電視節目看真人的對學英文會比較好。介紹你幾個兒童節目，有些YouTube可以找得到：
BBC Kids / CBeebies 的mister Maker 教做art & craft 適合幼稚園和初小。BBC的兒童節目全部都幾好睇。
Baking impossible - 焗蛋糕的比賽節目，幾有趣
Blippi & Ryan介紹玩具，小朋友一定有興趣.
小朋友對英文書冇興趣，但是不是對閱讀中文書有興趣？只要小朋友喜歡閱讀，要加英文故事書應該不太難。不論那一種語言，多讀課外書是最有效的最基本的方法。英文課外書可以揀多啲漫畫以外的，學校小二應該仲有時間親子共讀。其實英小只是多兩科用英文教，個人認為學英文其中一樣最重要是睇多啲課外書，什麼都要讀。還有就是多聽、多講，俾多啲機會小朋友講，和小朋友輪流讀英文書，小二課文都ok.
加油
作者: TAIOU4 時間: 24-2-22 20:36
將網上net oral改成Topic對話形式
Topic可以是潮流新聞或青年新聞網內容
並且1星期上2堂 & 每堂1個鐘
如該老師做唔到或做得唔好就換另一個
如果都係唔肯開金口
就可能係性格問題
比起英文要更先處理
作者: sheepeep 時間: 24-2-23 12:02
本帖最後由 sheepeep 於 24-2-23 12:02 編輯
回覆 RainyRice 的帖子
謝謝你的建議及資料!
小朋友自行睇中文書的興趣都不大，基本上佢係唔想睇好多字，e.g.中文版dogman佢睇睇下字都變咗睇圖就算，dogman英文版都叫做肯自己睇哂。比較多字的書如果我伴讀佢都肯睇，所以我都要盡量抽返啲時間同佢睇書了。
作者: sheepeep 時間: 24-2-23 12:02
回覆 TAIOU4 的帖子
謝謝你的建議!
好彩佢都幾肯同宜家個net講野,
會試下叫個net從日常生活的對話著手。
作者: RainyRice 時間: 24-2-23 13:42
sheepeep 發表於 24-2-23 12:02
回覆 RainyRice 的帖子
謝謝你的建議及資料! 小朋友自行睇中文書的興趣都不大，基本上佢係唔想睇好多字，e ...
本帖最後由 RainyRice 於 24-2-23 19:38 編輯
加油！
作者: 天外之人 時間: 24-2-23 14:40
本帖最後由 天外之人 於 24-2-23 14:49 編輯
回覆 sheepeep 的帖子
現在才小二,還有進步空間,我同老公與你們一樣,都是半桶水小學能力人仕,雖知道陪伴及伴讀係好重要,但的確語境也是重要因素,我們亦都係以中文為主英文為次,我們一家常帶孩子到國內去玩(這是語境之一),英文因是中文小學,所以都去了正統既英國文化協會,報了星期六參與既玩樂班(這亦都是語境之一),所以中英的問題都得以解決,最終孩子亦都好順利入到出名英中,英文學習問題無咩困難. (不過有一點好重要,係孩子對學習是否開心,這點最重要)
我講出這是給你參考,衹是其中一個方法之一.給你多一個技巧,不論孩子考試測試多少分都好,就算唔合格,都一樣要讚賞,可以在其他方向讚賞,咁唔會打擊孩子唔合格引致失去信心,最重要唔會令佢唔開心去學野,始終孩子在學校裡,心底都會明白知恥近乎勇這個意思.
作者: TAIOU4 時間: 24-2-23 18:48
本帖最後由 TAIOU4 於 24-2-23 19:21 編輯
天外之人 發表於 24-2-23 14:40
回覆 sheepeep 的帖子
現在才小二,還有進步空間,我同老公與你們一樣,都是半桶水小學能力人仕,雖知道陪伴及 ...
同Net Chat一定比X國文化協會D補底班好10倍
好順利入到出名英中
英文學習問題無咩困難
仲要做到Top 10 (冇公開名次)
作者: Baymax 時間: 24-2-23 22:09
佢睇得Dogman應該可以睇 Diary of a Wimpy Kid, 有好多本, 有小量圖, 但又唔係漫畫, 好有趣
活動方便, 有謀國際學校集團的足球班攪得唔錯, 有好多國際學校到長假期都day camp活動, 有的係運動, 有的係science, 亦有野外探索, 要今佢可以自然地用英語和人溝通
另外推薦英文stem 班, 電腦coding, 或者Lego (係玩robot),
最後重有招, 用唔用自己考慮, 就係玩網上英文game, 唔好玩個的打打殺殺, 玩的用腦果的, 如mine craft, 國際象棋, 會識到的英文人朋友, 呢招當然要佢夠自制, 唔好沉迷,
作者: kooliestgirl 時間: 24-2-24 21:48 標題: 回覆樓主:
如有宗教信仰可考慮返英文教會，一班小朋友一齊自然講英文
作者: 天外之人 時間: 24-2-26 12:38
TAIOU4 發表於 24-2-23 18:48
同Net Chat一定比X國文化協會D補底班好10倍
好順利入到出名英中
英文學習問題無咩困難
分數名次冇公開係因為冇，且我都唔著緊呢啲，孩子學到野先係我著緊既事，不論成績好與唔好，孩子都會好快主動比我睇，這點就已証明孩子好享受學習，成績表上各科總平均分全都在分數以上都OK，更何況中學成績最主要都係睇最後既DSE為主，唔需要同那些學霸爭。
作者: 天外之人 時間: 24-2-26 12:55
Baymax 發表於 24-2-23 22:09
佢睇得Dogman應該可以睇 Diary of a Wimpy Kid, 有好多本, 有小量圖, 但又唔係漫畫, 好有趣
活動方便, 有謀 ...
作者: TAIOU4 時間: 24-2-26 12:55
本帖最後由 TAIOU4 於 24-2-26 12:56 編輯
天外之人 發表於 24-2-26 12:38
所指同Net Chat一定比X國文化協會D補底班好10倍呢點好唔好後話，之旦係若孩子連興趣或冇心之下，再用Net Ch ...
你好似真係冇玩過Net Chat
連有乜o野玩都唔知
淨係以為係港式補習班有份Notes / 功課
你小朋友怕醜可以搵專教幼兒老師教
雖然係Online
但內容係行活動教學
有D會扮鬼扮馬
有D知你鐘意乜就同你Show & Tell
試過有個知阿女鐘意整鬼口水就買料同佢一齊整
之後可以搵D同佢用Oral玩英文文字遊戲 或 Web Game
叻D就可以用時事新聞教英文問感想 / 意見
再高級D就可教中學課程
甚至乎Share行業經驗
因應不同玩法找不同老師
所以變化可以好大
X國文化協會D補底班唔係 1 on 1
教D o野只係去到補底 Level
重覆返小學課程
冇得跳級冇得請假
對叻少少o既小朋友真係大懲罰
作者: TAIOU4 時間: 24-2-26 12:58
天外之人 發表於 24-2-26 12:55
你所講既最後那招其實真係最有效用,我孩子也是玩Minecraft及The Sim大,當然都有玩皇者呢啲打打殺殺既遊戲, ...
作者: 天外之人 時間: 24-2-26 21:15
TAIOU4 發表於 24-2-26 12:58
識玩一定係玩Roblox
玩咩都好，孩子能学习好就得。
作者: 天外之人 時間: 24-2-26 21:25
TAIOU4 發表於 24-2-26 12:55
你好似真係冇玩過Net Chat
連有乜o野玩都唔知
淨係以為係港式補習班有份Notes / 功課
的确冇玩过，你講咁生動都係大人嘅你覚得，問题係小朋友而己。我只係讲有"语境"的情况下学习，且仲可以面对怕陌生的问题，将来要面试方式都唔会咁困难，我讲嗰种不是1对1这种，且你講这种都係以玩为学习方式，即係承认玩係主要令孩子有心嘅学习模式，只係少了語境，学唔学得好见仁见智了。
作者: TAIOU4 時間: 24-2-26 22:19
本帖最後由 TAIOU4 於 24-2-26 22:19 編輯
天外之人 發表於 24-2-26 21:25
的确冇玩过，你講咁生動都係大人嘅你覚得，問题係小朋友而己。我只係讲有"语境"的情况下学习，且仲可以面 ...
唔知你英文好唔好
我睇簡體雖然唔夠Native快
但敢說已可一目十行
不過我真係睇唔明你o既中文文句想表達乜
就算轉晒繁體都睇唔明
作者: 簡單啲來講 時間: 24-2-27 10:35 標題: 回覆樓主：
本帖最後由 簡單啲來講 於 24-2-27 10:39 編輯
今時不同往日，如果你哋小朋友讀中文小學，只有英文科用英文，並且本地老師都還唔係100%講英文情況下，要學好英文，我係講真正學好唔係僅僅做題叻，唔係一件容易事，放學後最起碼要按小時計去浸英文。至於你英文幼稚園帶上來的強勁英文語感，在沒有語境的情況下，優勢亦會快速faded，一兩年就殆盡。
作者: pollywcw 時間: 24-2-27 15:58
回覆 kooliestgirl 的帖子
請問有邊間英文教會俾小朋友
作者: kooliestgirl 時間: 24-2-27 17:32
pollywcw 發表於 24-2-27 15:58
回覆 kooliestgirl 的帖子
請問有邊間英文教會俾小朋友
本帖最後由 kooliestgirl 於 24-3-2 16:04 編輯
我小朋友返灣仔的一間教會
作者: sheepeep 時間: 24-2-27 18:25
唔該晒各位嘅建議。感激！
作者: 天外之人 時間: 24-2-27 19:00
TAIOU4 發表於 24-2-26 22:19
唔知你英文好唔好
我睇簡體雖然唔夠Native快
但敢說已可一目十行
我同老公都係有限公司，所以先至找一些有语境的地方，令孩子可以感受一下。网上教学的确係方便，但肯定会差一点，从之前疫情的网上教学，知识率有下降就知问题所在。另外网上教学只有视觉同听觉，有語景的地方自然五感都有，这对学习上都会有新鲜感而有所得益，唔係点会有咁多人都送去外国地方学习。
睇唔明会否因为太死板呢?你不是说每个家长都有唔同的方法吗?我孩子的中文会从我给他的文章修改中学习得到趣味，当然每星期都有到国内实景感受一下中文的运用，所以每一年学校都有抽样文章刻在书本上供人欣赏，我从来都放心主科冇问题。
不再说了，孩子应该从自修室离开，我去准备定晚餐，有空再说。
作者: TAIOU4 時間: 24-2-27 21:39
本帖最後由 TAIOU4 於 24-2-28 00:41 編輯
天外之人 發表於 24-2-27 19:00
我同老公都係有限公司，所以先至找一些有语境的地方，令孩子可以感受一下。网上教学的确係方便，但肯定会 ...
原來你想話X國文化協會有語景
Net Chat冇語景
睇尼我真係誤解o左語景o既定義了
原來 1 on 1 與不同外國人仕交流叫冇語景
坐定定12人一班睇片做作業先叫做有語景
我學到o野了
作者: Rpp 時間: 24-2-28 00:56
唔駛後悔無讀英小，我三個都係普通中文小學。中學最嘥時間係中文科。若果當年讀英小我死俾佢哋睇。中文百份百肥佬，英文其實易
追中文好多。
作者: Joemk 時間: 24-2-28 13:00
回覆 Rpp 的帖子
我都覺得我無後悔讀中文小學, 起碼中文日日寫, 中文學習能力差極有限.
至於英文, 叻唔叻, 其實都未必關中小定英小事.
英文叻, 可以家長栽培. 大把方法搞好佢.
中文小學, 一樣有英文叻(聽說讀寫)的學生. 尤其衣家年代, 學英文易過以前好多.
所以, 不用灰心. 你肯教, 佢肯學, 就成功在望.
作者: sheepeep 時間: 24-2-28 21:28
本帖最後由 sheepeep 於 24-2-28 21:35 編輯
Rpp 發表於 24-2-28 00:56
唔駛後悔無讀英小，我三個都係普通中文小學。中學最嘥時間係中文科。若果當年讀英小我死俾佢哋睇。中文百份 ...
作者: 天外之人 時間: 24-2-29 09:53
TAIOU4 發表於 24-2-27 21:39
原來你想話X國文化協會有語景
Net Chat冇語景
睇尼我真係誤解o左語景o既定義了
其次提及Net Chat講活動教學,孩子鐘意乜就同你Show & Tell,主要都係孩子要主動,被動式孩子隨時一個字"無",其次玩來玩去都係同電腦面前的一位老師,點及身邊都係同年齡階段一起玩好? 反過來稔,父母有否多陪孩子玩而令孩子從中去學習?
作者: TAIOU4 時間: 24-2-29 10:22
天外之人 發表於 24-2-29 09:53
你所指係不同外國人溝通,但都係死板的坐在電腦面前,衹可以講有語冇境.對棲主小朋友心態隨時沉悶下去. 且對 ...
家長可因應小朋友程度找不同老師
我相信了解自己小朋友的家長
一定會找到合適的教學方法
為自己子女上度身訂造的課程
並不是盲目的去上1對12補底班
你好像好信任尼間公司冇試過其他嘢
真係要代佢哋多謝你
作者: fmf903 時間: 24-2-29 10:49
中文其實仲難學，你睇幾間一線直資學校SPCC, SPB都係中文小學，入面個小朋友英文都一樣好叻。所以自己好好栽培都冇問題。
作者: 天外之人 時間: 24-2-29 12:09
TAIOU4 發表於 24-2-29 10:22
我嗰個就係小二開始玩
家長可因應小朋友程度找不同老師
我相信了解自己小朋友的家長
作者: 天外之人 時間: 24-2-29 12:12
fmf903 發表於 24-2-29 10:49
中文其實仲難學，你睇幾間一線直資學校SPCC, SPB都係中文小學，入面個小朋友英文都一樣好叻。所以自己好好 ...
作者: TAIOU4 時間: 24-2-29 13:32
本帖最後由 TAIOU4 於 24-2-29 13:38 編輯
天外之人 發表於 24-2-29 12:09
我不是信任呢間野,我衹係買佢環境,始終不是富裕家庭,很難有機會身在英國這些地方感受語境. 我就是了解自己 ...
好利害
連辯論例牌Point 眼睛建康都出埋
分分鐘之後會要用埋軟技巧同溝通能力尼打
不過對精明o既家長以上跟本不是問題
有控制力與運用方法已經可以全Point K.O.
仲可以將坐定定上補底班做作業比喻作感受英國環境
唔知仲以畀錢幫襯佢就等於搭o左飛機去英國上私校
最後幫襯完結果除o左比人貴外
同坊間同類機構真係有不及而無過之
淨係睇佢個經營手法己知佢好識做生意
- 心理戰術, 沉沒成本
幫襯佢之前要小學生考個幼稚園中班不如o既付費試
跟住畀頂高帽你戴話你可以入唔記得o左叫高級班定精英班
等 D 家長同小朋友都聽到 High 晒
尼個做法極其卑鄙
- 屈人畀一年錢, 否則收天價 (沒Discount)
坊間有幾多間要簽咁長約先?
- 以小時去定價, 但每堂是個半鐘
當家長見到個小時價已經覺得係差不多坊間最貴
點知仲要 x 1.5倍
尼個價上實體 1 對 2 Net Teacher 課都有找啦
最大騙局係個半鐘裡面有半個鐘係睇幼稚園Level o既不說話羊仔卡通
真好做
- 冇得更改課程上更高班
課程內容同香港津校冇分別
冇新o野學之餘內容淺到無論
唔係我做乜叫佢做補底班
- 冇得請假, 唔返都要返錢
唔記得有冇得請病假同補課
但坊間其他機構多數都係上幾多堂就畀機多堂錢
尼次終於可以感受到英式合約精神了
主要係以上數點
可能對富裕又沒有去比較坊間其他機構o既長期用家係沒有問題
但請你在盲推前
先試一試比較下其他機構或我所講的方法
同一個乜都未試過o既人去比較邊樣好
真係紙上談兵講乜都得
作者: 天外之人 時間: 24-2-29 18:07
TAIOU4 發表於 24-2-29 13:32
好利害
連辯論例牌Point 眼睛建康都出埋
分分鐘之後會要用埋軟技巧同溝通能力尼打
我就無得比較下其他機構,因為都無參與過其他野,連補習都無(除非你講這個X國文化協會係),所以如你所講同一個乜都未試過其他o既家長去比較邊樣好係有點差異,
作者: TAIOU4 時間: 24-2-29 22:57
天外之人 發表於 24-2-29 18:07
唔駛咁勞氣,你唔係講過各家長有自己認為合適既做法,更何況我衹是講出我經驗比樓主參考,家長做唔做係另一回 ...
識得用盡可用的辯論Point:
- 與其他小朋友交流
- 身心又健康啲
- 用大人角度
- 冇稔過小朋友心態
- 谷孩子學習
- 學淺啲好似浪費時間
- 教育睇法
- 自己孩子有成果就得
- 連補習都無
你咁寫只不過係假設性對號入坐
用意係將對方打造成一個怪獸家長
不過以上全部Point基本上只是你的幻想
越尼越覺得你同尼間o野好有關係
次次都Sales佢
當然我次次都會打殘佢
因為尼間o野堅搵笨
作者: 天外之人 時間: 24-3-1 15:23
TAIOU4 發表於 24-2-29 22:57
原來你中文有時都幾好
識得用盡可用的辯論Point:
- 與其他小朋友交流
做人唔好咁暴躁,對自己精神健康都冇咁好.
作者: Rpp 時間: 24-3-1 22:35
TAIOU4 發表於 24-2-29 13:32
好利害
連辯論例牌Point 眼睛建康都出埋
分分鐘之後會要用埋軟技巧同溝通能力尼打
邊間？
作者: tummypooh 時間: 24-3-2 12:30
首先，你要的英文好，係英文科成績好，定用英文溝通能力好，兩件事，英文溝通能力好，英文科成績未必好。
要英文科成績好，比較簡單，踢去補習，日做夜做練習，死記爛背，點都會有進步。
如要口語聆聽溝好，語境係好重要。唔好諗住田個啲咩咩動物TREE、XX協會一星期加埋得個兩三小時堂會有幫助，如你平日生活配合唔到，去呢啲班學口語80%係浪費金錢同時間。
如家長係日常生活能夠不斷用英文同小朋友交流當然最好（由BB開始，我女小四，廣東話、普通話，英語溝通係冇問題，情況你放佢去同國內小朋友或外國小朋友玩，溝通完全冇問題），但對於一般普通人家庭，未必會做得好或個個都做得到。其實小朋友剛學語言的時候真係黃金期，錯過左要補返真係要花比較大的力氣。
要日常生活都不斷同小朋友用英文，真係唔係個個得，如果自己都係半桶水，可能仲會教壞埋。咁點？都係個兩句，多聽多講。多聽其實而家比係幾十年前我的年代已經唔難，細細過就俾佢睇英文電視，YOUTUBE大把（只不過好多家長成日將網上視頻、手機當成怪獸），反正就係從BB好開始就俾佢睇外國節目，廣東話的卡通當呢個世界從來冇出現過，佢要睇就只有英文。唔需要睇得多，每日睇幾十分鐘已經好足夠。當然如果家長可平日都用埋英文（或某啲性況下用英文，會有更大幫助）
年代唔同，三四十年前，小朋友的語言能力未必相差好大，而家呢一代，只要搵到方法，好多小朋友廣東話、英文同普通話都冇問題。
作者: 加樂爹 時間: 24-3-2 13:41
英小最基本的是學校要維持學生英文水平.所以減輕了家長在高小才發現子女中英文兩頭唔到岸情況.
英小"有心"的家長, 發現只針對中文科, 英文科有學校"加強"的維持, 會輕鬆好多.
中小當然可以學好英文, 但因大部份學校不清晰定位, 更甚是"疏懶",中英文都隨隨便便!
想問, 中小學校有沒有把中文標準定得足夠高呢?
******************************
對大部份家長, 中英文好就是考好份試卷.
所以, x國文化協會, 補習社肯定最安心, 有規有舉, 有野唸, 寫句句字都複習d.
1:1 網上的我無用過, 應該是生動些, 有即時回應, 及伸延學習.
能夠幫你用英文思考, 去構想, 去表達 (並非那種罐頭式回應...如 you are welcome!)
對考試真係未必有即時明顯幫助.
但家長用得, 就應該貪心D, 引導到小朋友自主學習.
網課是導向, 課後是延伸學習.
以上兩種方法, 我看是家長取態, 亦都是學校教育方向.
想下學校每星期兩默, 唸書, 抄寫, 每月有測驗, 每晚排到寫痳痳...
學校唔會想你學物, 想物, 只是肯定你可以考好佢份卷, 好成績.
沒有空間, 何來延伸學習?!
英小特別是資源足的直資學習可以很好.
中文或要到4年級以上才感到"三國演義", " 慶余年" 那些文字...
中文遊戲天書minecraft... 更無心機睇
但英文書刊由幼稚園已經看得明, NG, How it works...初小已經把孩子帶到中學/成人科學世界.
You tube 大量片去睇, 淨係點玩魔術, 都好有門路...有時諗呢D野小學不去玩下, 到中學又點會有興趣呢?
既然初小已有能力用英文學習.
我認為好的英小學校不應把學生劃在考試柜架內, 或是指定的延伸學習區內.
人生可以是這樣, 有點空間為自已興趣去學習.
當然, 家長會buy 考試式教育, 在機械式下操作, output 有保証 (對跟得上既學生)
兩種方向, 都要引導, 要逼, 只是方法與目標(標準) 肯定不一樣.
我不信happy school 那種無為而冶, 或人之初, 性好學那一套.
最後, 讀書得唔得, 看小孩子天份, 家長給他培育環境是否合適 (不是足夠與否).
中小都可以學好英文.
作者: 加樂爹 時間: 24-3-2 13:54
tummypooh 發表於 24-3-2 12:30
廣東話的卡通當呢個世界從來冇出現過，佢要睇就只有英文
...
我都同意, 中日的卡通, 都不會在家中播出!
作者: TAIOU4 時間: 24-3-2 15:36
本帖最後由 TAIOU4 於 24-3-2 15:38 編輯
加樂爹 發表於 24-3-2 13:41
英小最基本的是學校要維持學生英文水平.所以減輕了家長在高小才發現子女中英文兩頭唔到岸情況.
英小"有心" ...
其實香港教育問題係一個好深層次o既食物鏈問題
有少少似舊西歐貴族系統又或者有套叫The Platform (饑餓鬥室) 的電影一樣
上層的人定規則給下層的人津守
但下層想要的都不是上層所想的
而當較上層的人得到所需後
就會反過來破壞下層的褔利
最大問題係訂立規則的人跟本不會津守規則
教育局內大部份識員子女都有OEA
而好多高級公務員都有閒錢給子女讀ESF或國際
佢o地多數子女跟本唔會讀一般學校及考DSE
基本上免費教育做得越好就會對付費教育越不利
所以如不限制公務員子女要津守規則的話
香港教育一定會越玩越爛
不知是好彩還是唔好彩
學校課程廢對部份人來說又是好事
例如比較有能力的家長會輕易找到方法去陪育子女
用最適合的方法去教育自己孩子
使得孩子可用最少力氣就可把課程應付
並有時間做自己興趣
如樓上所講只要看對書玩對Game上對堂
已足夠在香港平庸的教育環境中出類拔萃
但若教育真的成功改革的話
間間學校都專科專教
不會英文老師講Konglish
體育老師數學
個個兩文三語都流暢自然
我想應該沒有人會花錢去上30年前沒網絡年代的英文進補課程
基本上又會係另一個地獄
到時家長便不可再帶孩子搭直升機
真的只可同同學鬥高智商同勤力了...
作者: TAIOU4 時間: 24-3-2 15:41
本帖最後由 TAIOU4 於 24-3-2 17:22 編輯
加樂爹 發表於 24-3-2 13:54
講得好, 夠絕!
我都同意, 中日的卡通, 都不會在家中播出!
我比較喜歡出奇制勝
個方法太神奇所以我陣間會 Del
無謂太多人跟....
我教中文o既方法係
.
.
.
.
.
.
.
.
作者: sheepeep 時間: 24-3-2 16:44
本帖最後由 sheepeep 於 24-3-2 17:03 編輯
回覆 tummypooh 的帖子
主要係想小朋友英文溝通能力好，請問你小朋友係咪讀英普幼稚園？其實我都係後來發現讀英普幼稚園打好咗個底，
無論日後讀中小定英小(當然要維持適量語境)都可以keep到流利英語，
因為屋企校網好麻麻，所以一心比佢讀龍幼（無咩語境可言)，
不過就算當時讀英普（2019年K1),
根本中哂疫情的3年，靠學校都唔會有咩語境比到佢。
小朋友1歲開始比佢睇英文DVD( 佢宜家都係幾乎只睇英文節目），
再加english story audio放題,每日伴讀英文故事，
不過我吔英文唔好，就無同佢用英文溝通了。
可能大部分都係input, output 太小了，
宜家都8歲了，好似你咁講，過了語言黃金期，真的很難追，亦很吃力 。
作者: sheepeep 時間: 24-3-2 16:50
回覆 加樂爹 的帖子
其實唔使到高小，小朋友小二，我宜家都發現兩頭唔到岸了，但宜家轉英小係咪適合係咪值得?!
要轉亦都唔易。:(
作者: itckei2003 時間: 24-3-2 17:14
本帖最後由 itckei2003 於 24-3-2 17:16 編輯
如果英文能力足夠, 絕對值得先英後中.
中文係難, 但係中文優勢, 只係為考試 (主打中資公司又或者一心向祖國發展另計).
英文優勢係可以伸延到外國升學以至工作. 非中文可比.
另外, 英文有海量教學資源, 只要英文過硬, 任何學科都可以輕易得到學習資源, 我就經常去 amazon 亂咁買書俾個女睇. 佢小二讀英津龍校.
當然, SPCC 級學生就無乜所謂. 學埋日文德文法文西班牙文希伯來文都仲得.
作者: 簡單啲來講 時間: 24-3-3 05:10 標題: 回覆樓主：
本帖最後由 簡單啲來講 於 24-3-3 05:12 編輯
睇英文水平好唔好唔係單單睇做卷操題，溝通。主要睇寫，寫的品質。有語境的針對教學，實好過睇YouTube，睇卡通片。
而且老實講睇再多英文小說，如果冇針對訓練，要寫出好品質，details英文並不易。
作者: 簡單啲來講 時間: 24-3-3 05:22
sheepeep 發表於 24-3-2 16:50
回覆 加樂爹 的帖子
其實唔使到高小，小朋友小二，我宜家都發現兩頭唔到岸了，但宜家轉英小係咪適合係咪值 ...
其實語言係相通的，只不過要假以時日。如果沒有英文語境，係更有利學好中文。過早的讓小朋友浸英文會干擾中文學習。沒有什麼學語言黃金期，魚與熊掌不可兼得。兩頭唔到岸不如隨遇而安，深入學習中文後，上到中學，有語境的話，再潛心學英文，一點也不遲。
作者: 簡單啲來講 時間: 24-3-3 05:49
itckei2003 發表於 24-3-2 17:14
如果英文能力足夠, 絕對值得先英後中.
中文係難, 但係中文優勢, 只係為考試 (主打中資公司又或者一心向祖 ...
本帖最後由 簡單啲來講 於 24-3-3 06:00 編輯
本帖最後由 簡單啲來講 於 24-3-3 05:53 編輯
此言差矣。我始終認為你是哪裏人就首要把母語學好。比如母語係中文，我哋最終學得的係中華文明，英文來說只不過係掌握先進野的工具。如果學習母語係為咗考試，學習英文係為咗搵工，咁你長大後即使出國工作生活，自身文化認同上會比較難。因為要像歐美人那樣運用英語，對於我哋中國生中國長，父母又是中國人來講係好難件事。那種才是真正兩頭唔到岸。宜家已經唔係英治時代，沒有文化認同，係很難像以前咁學英文信手捏來。宜家某種程度來講學好母語走遍世界都不怕，前提英文工具也不差。
作者: itckei2003 時間: 24-3-3 19:23
本帖最後由 itckei2003 於 24-3-3 19:23 編輯
回覆 簡單啲來講 的帖子
完全同意!!
宜家某種程度來講學好母語走遍世界都不怕，前提英文工具也不差。<<< 先中後英
宜家某種程度來講學好英語走遍世界都不怕，前提中文工具也不差。<<< 先英後中
作者: fasola 時間: 24-3-3 20:21
讀英小唔會幫到英文. 讀中小亦唔會幫到中文.
兩者差別就係數學同常識科用書.
呢兩科唔會幫到語言太多.
並唔會因為用英文學數, 就會英文變好.
都係要靠語文科本身, 同課外閱讀
我自己讀英小, 坦白講, 我自小英文好普通, 因為學校以外無好語境. 當年無睇課外書. 到高中多睇明珠台先至有多少進步.
現時小朋友讀中小, 佢幼稚園時英文已經好好, 中文略遜. 之後讀中小對佢學好中文有無用? 無.
我每日都花好多時間幫佢溫中文閱讀理解.
無論中小定英小都係一樣.
作者: ifcsir 時間: 24-3-4 03:29
RainyRice 發表於 24-2-22 14:06
本帖最後由 RainyRice 於 24-2-23 22:14 編輯
小朋友的直中是英文中學的嗎？既然學校有信心在中小直升 ...
謝謝你分享給樓主，讓我來偷師，小朋友還在（劵幼）幼稚園，唔肯對人講英文，我都要努力努力
作者: tailinlin 時間: 24-3-4 08:19
fasola 發表於 24-3-3 20:21
讀英小唔會幫到英文. 讀中小亦唔會幫到中文.
兩者差別就係數學同常識科用書.
完全唔一樣，讀英小每日返學都講英文，同讀中小係有分別。學英文如果只為了考試，操grammar 當然有分別，但如果想學好聽講，英小優勢會更大
作者: tummypooh 時間: 24-3-5 18:53
回覆 sheepeep 的帖子
我小朋友只係普通幼稚園，廣東話為主。其實學語言最緊要係有冇機會用，用得多，自然學得快。
8歲, 係遲左少少，但未至於好遲。
主要係你要搵啱方法
作者: airwalk 時間: 24-3-14 14:56
TAIOU4 發表於 24-2-26 12:55
你好似真係冇玩過Net Chat
連有乜o野玩都唔知
淨係以為係港式補習班有份Notes / 功課
與其上個D英文班, 真係不如花錢比小朋友上外國學生活動, 只有小朋友同小朋友溝通會學成長得快好多.
作者: airwalk 時間: 24-3-14 15:16
tummypooh 發表於 24-3-2 12:30
首先，你要的英文好，係英文科成績好，定用英文溝通能力好，兩件事，英文溝通能力好，英文科成績未必好。
...
我都係用咁方法,
係小朋友BB個時世界只有英文卡通, 英文書, 日日要佢睇youtube.
世界冇廣東話卡通出現, 2姐弟只能用英文溝通. 將英文種入大腦, 入骨入血,
以英文作為第一語言, 中文第二.
作者: jenjenny 時間: 24-3-15 17:11 標題: 回覆樓主：
本帖最後由 jenjenny 於 24-3-16 12:45 編輯
我女兩歲前都唔多識講中文，我哋只用英文同佢溝通，只睇英文卡通，日日同佢讀英文書，閃英文卡，總之當佢係外國人咁教。英文入骨入血，無可否認佢讀英文科係好輕鬆，但讀中文好辛苦，想攞高分要比其他人花更多時間，小學都仲可以將勤補拙，到中學見真章分數反應正體中文能力，唔係勤力就補救到，我而家都未諗到方法解決。所以小朋友從BB開始就算家庭點樣重視英文，都要加插中文訓練
作者: 天外之人 時間: 24-3-22 12:38
本帖最後由 天外之人 於 24-3-22 12:39 編輯
咁多年讀到中學,且這裡家長都感覺英文係重中之重,聽孩子講考試小組討論唔難又好笑,原因係有人講迪士尼咁出名都可以講(Date尼),感覺有點匪夷所思,是否都係死板背書而已,邋是講(Date尼)係啱.
作者: Jean1769 時間: 24-3-26 14:11
如果真係咁重視英文，就應讀國際學校
讀英小的學生，就算英文講得多但好多都係難忍，同ischool好大距離
| 歡迎光臨 教育王國 (/) |
Powered by Discuz! X1.5 |