我的孩子評為邊緣讀寫障礙

yywhk

yokilau,

多謝你回應,我都同意我囝囝係好彩,好彩在佢早發現同揾到方法開始治療改善....

你小朋友幾大? 評估報告算唔算嚴重? 無論如何, 佢肯俾心機日日去温,就點都唔好責怪佢.試吓好似我咁,佢一考完試,測完驗就即日獎勵佢, 一科有心機温就一科科咁獎吓佢都得架(有時我特登煮味佢最鍾意食o既餸都會聲明係獎勵嚟架嘞, 唔一定用好多錢,或要帶佢去街) , 其實小朋友努力但得唔到好成績响同學仔間已經好多壓力......做家長要俾好多好多支持,佢地先唔會放棄......我囝囝都曾同我講過d同學仔奚落佢o既說話俾番我聽, 我聽到都想喊   ......

不過, 你肯早成個星期同佢開始温習,你都係一個肯同小朋友並肩作戰o既媽咪,問題係要揾個適合佢o既方法啫,你唔介意可以大家研究吓噃!  

montery

YYWHK,
上一次我去學校做義工時, 佢班主任同我說, 見佢英文默書終於有一句是完整的了, 原來老師那一次站在個女身邊, 望著她寫,慢慢讀出來, 不過, 我個女D短暫記憶實在太短了, 她又寫得慢, 所以好快又不記得老師默的是甚麼宇, 那以都是零分.
但老師都好開心, 仲叫佢"Don't Give Up".不過, 我個女都不知發生甚麼事, 只是知道溫習了這麼多次, 吵了幾天, 佢都喊了好多次都是這樣.  
今早, 同佢換校服, 我跟她說, 由下月起, 不如我們每天媽咪回家後, 也默5個中文, 5個英文了, 佢聽完,又在發脾氣, 將件校服扭來扭去... 不作回應.
我其實是否同佢溝通上有點問題, 還是佢根本對學習沒興趣?心理學家給我的報告, 是說佢多言, 不專心, 最缺乏的是自信心.
這個我也知說, 小時候, 佢經常同人說:我沒有爸爸的, 爸爸死了. (因為我媽好討厭佢爸爸, 所以當佢死了), 但佢見到其他人有佢沒有, 這方面已令佢在人前沒信心. 為了不想我阿媽不高興, 我也沒跟女兒說這件事, 及後, 有朋友跟我說, 不可以騙小朋友, 你跟佢說真話佢會明白的.
有一次, 當只得我兩個的時候, 我跟佢說, daddy和mummy因為不開心所以分開了, 不代表我們不喜歡妹妹你, 只是我們兩個人的事. 因為daddy走了這麼年也沒找我們, 我想佢已經死了...
由那天起, 她每天也笑, 她以前也會笑, 但兩種笑是不同的, 佢會同老師說, 我daddy走了,媽咪以為佢死了, 我其實有daddy的, 所以現在, 我想要重建佢自信在做其他了

ccaa

montery, 小朋友一定要有自信才會進步，　我地做媽咪ｇａ見到小朋友做一得好要多加鼓勵，　吾好睇少果一個掌聲同擁抱，係佢地建立信心的第一步．．

你小朋友係咪已經做左評估架ｌａ，　如果係理應英默只須默生字吾使默句子架，　我女都係，佢默書ｅ＋高分左好多ｌａ，　佢又回覆信心．．


我記得以前未知小朋友有讀寫障礙時常常吾明白為何總比人差，　溫左都吾識ｇａ，有無帶腦返學架，　每次做功課總會係有喊聲，責備聲，　大叫中完成，　想起都覺得我自己ｄｉｎ左，　重咩嚇到個女連喊到吾禁喊，　越鬧佢就越吾識，　連識都變吾識，　問佢佢又吾答你，　真係火都黎埋，吾打吾安樂，打完又好後悔禁對佢，　人情緒一下子吾知點算，　所以有一個機會有個專家同我話帶小朋友去做評估ｌａ，有時佢都吾想架，　你再係禁大家都會她痛苦，ｌｅｅ個係我未做評估時，我自己覺得自己係個不個不知所為ｇａ家長

windywong

原來星願小王子係教育城都有d工作紙可以download, 唔洗錢, 可以印出黎比小朋友做練習, 我就不停自己改d內容, 大家試下用下..

http://spld.proj.hkedcity.net/website/download_worksheet.htm

ccaa 寫道:
我女學校係有星願小王子免費ｇａ，我買左先知學校有，　禁ｌｅｅ套星願外傳我都有興趣，好等我打去學校問下幾時先有，如果太遲睇黎我又要比＄＄買多套ｌａ．．．

各位自己買係有得ｐｒｉｎｔ部首出黎架，　如果學校就無，　有分別的，　通知大家一聲

montery

CCAA,
我同你一樣, 初初真的din的, 女兒做完評結果估是介乎讀寫障和非讀寫障的灰色地帶. 即是說, 專心點的, 可能好D,又或者努力一點的, 又會變成不是讀寫障, 睇個女心情同狀態做那個評估.
講真, 1個小時的TEST對小一小朋友會否太長太多搞到佢地根本沒心機做? 我不知, 只知我個女沒耐性, 重覆做的事對佢來說提不起勁, 所以. 叫佢串英文, 第一,二次佢會串, 第,四次就亂來, 次次都令你火滾 ,打佢,   罵佢都是這樣....
不過, 其他家長也, 慢慢來, 用一個暑假同佢追回多少,上小二也不會太辛苦.佢比表哥已好好的了, 起碼佢智力正常, 唉, 2個小孩也在我家, 有時麵幾頭痛的.

Kechpchg

Hi YYWHK,

你好!

我的囝囝今年九月升小三, 也有輕微讀障, 英文科沒有大
問題, 中文科則較弱, 數學運算沒大問題, 只是有時因文字題有點誤解而失分.  中英默書提早一點溫習,平均都有
九十幾分.

我囝囝在去年小一暑假做評估後被評有輕微讀障, 在這年裡, 我都不斷在找有效治療方法及在溫習時所用的策略等...... 在你的留言中, 知道你在你囝囝讀二年級時, 也給了他一些訓練, 可否分享一下?

謝謝!

kechpchg

yywhk

Dear All,

我見大家有分享同回應,真係好開心......但我一人得兩隻手一個腦,打字又唔算快,不如我短短地回應吓想分享o既媽咪,唔係唔再傾,只係想快d寫埋我囝囝二年級發生o既事,因為如果太零碎咁講,覺得d資料有用o既媽咪可能睇得好亂....但大家有興趣知清楚d即管post上嚟一齊研究吓

montery,

你點名回應分享,咁我放心d今次我冇得罪人.....因我有時都會主觀咗,擔心會講錯嘢唔知架...

anyway,我睇到一半你個post就估你囡囡係冇自信,......自信心培養唔係一朝一夕可以建立....但你囡囡似乎都介意daddy o既角色,咁你對佢講清楚後佢開心番已經係好明顯.....你有冇 d replacement 角色 (如外公,舅父), 可能或多或少都會幫佢多d. 另外,你要揾佢最擅長o既本領入手,我囝囝把口叻,英文又幾好,咁俾佢參加朗誦節比賽咪啱囉! (至正係佢真係攞到獎).....如果畫畫好,咪通屋貼佢d大作囉!! 再唔係,你把佢d大作編輯為成(相)册,俾佢威吓,可能都得架! 同佢傾多d計,問吓佢鍾唔鍾意咁樣表揚佢o既長處.....最了解你囡囡o既應該係你, 快d發掘吓啦!

至於默十個字....佢咁抗拒,你要落吓藥....話媽咪專登(好辛苦咁)抽時間為佢去學習,學咗一套好好o既新方法去幫佢,有d人話得喎,你都好想試吓佢啱唔啱用.....又係嗰句,你至係佢媽咪,你應該清楚點樣佢至會受囉! 仲有你唔好一開始就十個字又中又英惡補咁貪心嘞.....佢咁抗拒,你選定一樣由五個字開始先啦,一個星期左右,佢應該可以分出係冇乜壓力,肯加字架嘞.......and,英文我唔係好清楚用同樣方法得唔得,但我自己就一定唔會用呢個方法去温英文默書囉......似乎係應該學phonics 多d.

yywhk

ccaa,

每間學校對讀障調適係唔同架....我囝嗰間offer俾佢o既只有"放大試卷,加時,同重組字句唔駛成句抄---只寫number 咋",平日係冇任調適架. 考試要求加時的話,就要係同同學仔分房考, 我地唔喜歡咁o既安排,覺得即使佢成績係好咗都會影響囝囝信心同發展,結果係冇採納過......

我好同意你所講明白了解問題所在之後,對自己同小朋友都反而係一份心理上釋放.....我曾擔心過囝囝唔接受自己o既問題,但意外地,佢係好接受,仲係好釋然嗰隻添!

yywhk

chiho

我剛剛直接上去買星願外傳，我女兒急不及待安裝。
她玩得好開心，而且又有讀音，我女兒非常喜歡。
我又可以與她一齊玩，看來我沒有買錯。

ccaa

yywhk , 你講開學校我都想講下ｅ＋我小朋友間學校，佢地除左以上安排外，重外分組，　我女果組有５個小朋友佢地都有學障，上英文堂都有位英文老師伴讀幫佢地，我曾經為左ｌｅｅ個問題搵學校ｌｅｅ方便負責老師，分組會吾會影響我小朋友，（同你一樣想會吾會打擊佢自信），　佢話我女係全組最叻果位，佢做完功課會教其他小朋友，如果吾同佢分組，　佢去到其他組又吾同左，　會無禁有自信，吾知你明吾明，聽完我去問我小朋友，　ｌｅｅ組開心嗎　？　佢話好開心，　禁我就順住去讀．．

至於＋時係最後個學期先有，　我想係為左ＴＳＡ　ｌａｗ，無錯係要另一個課室考架，你所擔心問題我又無想過ｔｉｍ，　我只想到＋時１０分鐘都好呀　！　好似數學科佢可以再反卷睇清楚有無錯，禁分數都高ｄ，今次大家吾同睇法ｌａ，　ｈａｈａ．．．

係ｌａ我都想問大家點同小朋友講佢有咩ｌｅｅ個學障問題ｌａ．．．

ccaa

chiho 寫道:
我剛剛直接上去買星願外傳，我女兒急不及待安裝。
她玩得好開心，而且又有讀音，我女兒非常喜歡。
我又可以與她一齊玩，看來我沒有買錯。

放心ｌａ，　我買第一套時都覺得無買錯架，　我都要寄票去買ｌａ

windywong

真係唔明, 既然香港有成10%學生有讀寫問題, 比例唔算少, 點解都唔覺得學校有d咩資源比到呢d小朋友...???

[size=x-small]http://hk.news.yahoo.com/070429/12/26gxd.html

yywhk

yywhk

Kechpchg,

唔好意思呀,....較早我post過一次覆你,但bk出現error,出唔到個post,反應又極慢,囝囝仲要係咁催我佢都要用電腦......

簡單來說你囝囝情況同我個好似喎,咁唔好擔心....

馬上開始寫二年級階段.....
      :evil:  :cry: ...            ....百感交集篇..

yywhk

.....續上...

話說囝囝二年級一開學,我覺得佢有少少返轉頭現象,係指佢又d字開始唔記得,但多數係 "的而且確"呢類比較抽象o既字...仲有佢寫d字一開學又醜咗又慢咗....

但佢响大口環d評估開始出報告,物理治療師comments為 clumsy,但冇大問題....即係可以唔做嘢就唔做啦....,老實說,我眼見都覺佢個人論盡,但都唔算係大問題, 又都唔想囝囝請太多假做d無謂嘢....close file

但職業治療師(OT)方面就覺佢協調有問題....但冇詳細書面報告睇,只有口頭解釋...OT好簡單咁教咗我同佢做小小練習,包括剪紙同一d大小肌肉訓練呀咁......跟住要等兩個月先再有覆診.....我心諗:咁就算係訓練?

..待續....

chiho

我看囡囡玩星願外傳，發現趣味性好高。

yywhk

.....續上...

結果一方面我從新同佢再用番舊年用過o既訓練, 另同佢揾到 灣仔小童羣益會有讀障班,另外中環中心地庫又有 聖雅各福羣會都有辦讀障班......我兩邊都同佢報晒....藥石亂投嘛....而且呢d班好麻煩,最少幾個月先開一次,而你一miss咗,佢多數唔會俾你插班,叫你報下一期喎.....除非佢好唔夠人啦......我唔想再等....咪係唔係都報咗先囉!

前者收費好平,好似係三幾百蚊六堂,但囝囝話d 嘢基本上佢學讀寫樂同d電腦中文遊戲都接觸過,主要係教佢地點去認一個中文字,初班完咗會有中班,延續一下咁....另外都有d眼手協調之類訓練......但因囝囝學咗一期唔想學,佢又太多課外活動,時間唔夠用,就冇延續嘞

後者就貴d...一期好似係五堂,約六七百蚊,但課程係連續性一年咁分五期(唔記得太清楚)....但總之全年係用咗我四五千蚊左右......

另外我俾囝囝上咗幾個月毛筆字課....出乎意料之外....一向唔鍾意攞起支筆o既佢居然好鍾意喎,仲好俾心機去寫添.....

在我自己方面,除咗同前年一樣時常去圖書館同上網揾資料同上d親職課程外,我終於留意到原來有一d讀障家長班.....我唔想响自己對讀障一知半解o既情況下"任人劏",因為一般私人機構d OT,學障輔導o既質素良莠不齊,因我係全職媽媽,有工人姐姐幫忙家務,咁最多o既就係囝囡返咗學之後o既空餘時間....我分別上過"協康會"同"小童羣益會"....我覺得自己親自上咗呢d班先至係真正清楚明白讀障係咩一回事,亦同時有機會感受一吓佢地日日(甚至時刻)都要面對的困難   .....同時我上開o既 HKU SPACE 同 救世軍合辦o既親職課程 亦講到第三期 ---提昇學習動機.. (第一期係 EQ情緒 ,第二期係 AQ 我都响囝囝一年級嗰年上咗)...真係咁啱咁橋...三期都係响我頭痛緊囝囝D問題時開課上嚟幫我解決問題o既......我自己雖然一向信奉"happy go lucky"...但即使我地一家唔係教徒,不過囝囝一直讀教會學校,連我都真係開始有d懷疑係神o既意旨囉......

(以上及日後我提及的機構,全都是政府,非牟利團體,全冇賣廣告成份架....因我屋企得一個人揾錢四五六七八個人使,我都好孤寒唔會亂使錢.....大家放心睇落去啦.....    )

....待續.....

yywhk

ccaa,

如果你囡囡讀得開心, 咁我就建議唔好掉組住嘞.等佢多d信心先.

其實真係人人情況唔同, 我同囝囝傾佢想唔想加時嗰陣, 問過佢其實一般佢都係做得晒,有時好彩仲有dd時間番check部份答案添,咁我地衡量過佢既然又唔係做唔晒, 分咗房考又驚佢d口衰同學仔踩佢, 同埋我囝囝係完美主義者, 就算加時俾佢考到第一,呢個囝都係會耿耿於懷,咁又何必呢? 索性由佢同人公平競爭,反正佢都算係中流,最多咪跌十名八名,都唔係好傷...(我都做到少少"讀書不是求分數"架..  )

但有一點我到而家都搞唔清楚,希望有人可以好肯定咁答我o既係: d學障兒童响公開試究竟有冇調適架????????

我當初以為冇,所以盡量 push 囝囝同別人看齊, 但二年級個社工同我講話可以有調適.....但最近至知原來好似係要考公開試之前同考試局申請,並且要再通過評估決定批唔批,同好似唔係一次過全科批,唔知係一科科定係點....總之都唔係咁straight forward.

anyway, 我都係奉勸各位媽媽一句, emb 指令小學o既所謂調適其實都唔知係唔係"糖衣毒藥" (我語氣可能較重會令大家有d不安, sorry!),因為d學障小朋友讀書冇咁辛苦,d家長咪冇咁大聲嘈要求多d資源去輔導呢d小朋友囉!

但大家諗深一層,如果呈分小五小六都仲可以調適, 咁上到中學又點 (我睇新聞見過有d話搞到好 le hei), 到咗會考或公開試又點,係咪仲可以一直安排調適架????? 為安全計,我始終建議大家唔好太安於學校給予o既調適安排,長遠目標始終都係要盡量提昇小朋友o既讀寫能力....調適只可視作為過渡安排,用嚟恢復小朋友o既信心同加強佢地o既學習動機的工具之一嚟咋.

最後, 我係分階段咁同囝囝講佢d讀障o既, "十隻手指有長短", 佢最短嗰隻係佢d中文.....   

洛婷

chiho 寫道:
我看囡囡玩星願外傳，發現趣味性好高。

chiho,

你好,我想問下你邊到有得買星願外傳呢,
價錢貴唔貴,如果唔太貴我都想買一盒比囡囡玩,

因為我發覺囡囡都有輕微讀寫障礙,
囡囡試過將太陽寫成陽太,玫瑰寫成瑰玫,
狐狸寫成狸狐,秋天既秋字,先寫火字邊再寫禾字,

另外朗讀都會,例如讀詞就會讀成語,讀語就會讀成詞,
讀寫字既寫又會讀成字,有時讀字又會讀成寫,
你聽我就咁講,唔知你覺得算唔算嚴重呢,

洛婷