教育王國

標題: 我唔識做人媽媽 [打印本頁]

作者: ChingMan1002 時間: 09-8-4 13:28 標題: 我唔識做人媽媽

我個囡14個月時被評為ｇｌｏｂａｌ delay, 大小肌慢了八個月, 認知慢了近九個月至一年. 而家排緊s位, 响政府同私家有做ot同pt. 經過大約一年既training, 係有進步, 不過好慢, 同同齡相差仍然好遠, 佢毎次training都喊, 唔多肯做, 成日扭抱, join過playgroup, 音樂治療都係咁, 完全唔投入，毎次去完呢d活動後我都會好沮喪, 雖然唔想比較, 但係見到人地個d個個都咁乖, 自己個個就好似唔耐煩咁, 成日扭抱. 我唔知究竟佢係咪有自閉傾向定點, 佢而家差唔多兩歲（２２個月）仲未識行, 爬, 自己唔扶野企, 唔識講野, 只講bb話, 間唔時會講爸，姐．　ｔｈａｔ’ｓ　ａｌｌ．有以下問題好似問下大家:
1) 現階段應否去做言語治療?
2) 是否有自閉証? 佢都鍾意轉既野, 有eye　ｃｏｎｔａｃｔ，玩玩具比較慢熱，要好耐先會鍾意玩第二樣．　唔會／唔識同其他ｂｂ玩，但大人同佢玩都ｏｋ．
３）應否帶佢試針灸，我係好怕佢比人針到周身都係，好驚嚇到佢發惡夢大喊．（而家已經晚晚都瞓得唔好，懷疑係濕疹引致痕）屋企無人會贊成．但係這係我唯一唸到可能幫到佢既方法．
４）佢會唔會係弱智？因為佢好多好基本既野都唔識，好似拜拜，拍手，用杯飲水，用ｓｐｏｏｎ食野．．．．教極都唔識．有些野都會模仿．
５）聽職業治療師講，幫佢報左出面私家ｓ位（超貴，不過比到幾多我幾多啦）．下個禮拜一返嗱，平時有大人陪都喊，返學大人唔入得去．不敢想象佢會喊成點．一定心痛死．
我同老公要返工，老公不嬲都唔覺得個囡有好大問題，成日話我過分緊張，老爺奶奶成日嘈，根本佢地個個都唔明，好多野都係我一個承擔，比咩ｔｒａｉｎｉｎｇ，金錢上既重擔．．．．好擔心以佢而家既進度點追得返．擔心佢認知問題多過大肌肉．真係好辛苦，我唔知自己可以點做先幫到佢．．．．

作者: hcily 時間: 09-8-4 14:16

你替她報私人S位,已經幫了她很多,無論怎樣痛心,也要讓她去接受訓練,22個月未識行真是一個問題.
多些跟同路人交流,可以減輕壓力.
你既然報了私人S位,應該已包括言語治療,不用再額外找.針灸我個仔都未試過,唔敢評論.至於智商,要由專業人員去評估.無論結果如何,都是自己寶貝,不要太介懷.
至於家人的意見,很難一致的,我老公及老爺奶奶同樣認為孫兒沒問題,我也是孤軍作戰,不過我絕對不會因此拖延他的治療,總之他們有他們的意見,我有我的行動.

作者: cakev 時間: 09-8-4 23:19

HI chingman,

我好同意hcily的講法,唔好理你老爺.老公.99嘅唸法,只要自己覺得對就去做,唔好放棄呀!唔好信''佢大個啲就会好架la'',,我就你俾這句話陷害了,十分後悔!!!!!!!!

我個女現在26months ,前2個月先評估為自閉傾向,當時佢都係唔識講嘢,叫極都唔應,但這兩个月上子st training好咗啲啦,會講單字和認知有進步,雖然同人哋相差好遠但都無辨法,急都無用。

我老爺&99都係唔太接受,99仲話我个女醒haha有冇攪錯........唔話佢蠢算偷笑la....佢都成日叫我唔好哂＄上st training架,我咪同佢講 '你唔係好想佢好番架咩,自閉症係冇得医gei,啲＄當用左去做手術or 睇医生law'。

作者: conconma 時間: 09-8-5 12:15 標題: 回覆 1# cakev 的文章

你都幾勇敢, 夠胆同老爺奶奶講仔仔0既問題...我就仲未有勇氣

自從經歷阿仔2個月時話佢聽隻耳有弱聽, 然後比人賴因為扔0左個神位后, 我都唔敢進一步同佢0地講阿仔有自閉

作者: ChingMan1002 時間: 09-8-5 14:03

我老爺只係識不斷講點解bb咩都唔識, 奶奶就只識日嘈放嘈, 煩到死, 我同佢地講bb發展慢佢都唔明白啦, 其實見到佢咁, 好多時都心灰意冷好想放棄, 只係心裡面不斷叫自己振作落去.

作者: conconma 時間: 09-8-5 15:29 標題: 回覆 1# ChingMan1002 的文章

唉...真係家家有本難唸的經

不過, 真係千祈唔好放棄...

記住我和你是風雨同路, 我們的路是比一般家長難行, 但不是無路可走…出路是有的, 希望是有的…最重要是, 多體諒, 理解, 觀察, 主動溝通, 無比耐性…不要怕、不要退縮，堅持下去…對孩子有不打洋的愛和期望──帶著一份鍥而不捨的愛心，建立對孩子持續性的期望這是座右銘!! 對孩子期望是需要有, 但絕不能操之過急, 揠苗助長是不可取的, 所謂[欲速則不達]!!

加油!!

作者: cakev 時間: 09-8-5 17:19

多謝你讚我'勇'同佢倆老講囡囡的實況,,,,,haha我有我講佢咪左耳入右耳出。不過我覺得不吐不快,你愈唔想聽我愈要講,講到佢都明為止。

加上我發覺同其他人講多啲亞女嘅事自己冇咁大壓力,而且啲朋友都会俾吓意見eg.佢邊方面好左or差左, 因有時對得佢耐發覺唔到。
。

仲有chingman你要得閒同老公洗腦＆叫佢同bb一齊去上堂,等啲專業人仕同佢講bb的情況,俾佢知我們不只是婦人之見。伴侶的support好重要架,,我係度都要thx我老公的支持＆借個shoulder我喊,,唔係真係唔知点。

仲有想問你囡囡係邊到上職業治療?進展如何?想compare吓那間好,thx.

你bb同我個女差唔多大,希望可以交流多啲心得la。我亞女明天返I位la,,希望佢可以快啲適應啦。

作者: hcily 時間: 09-8-5 20:44

conconma 說得對,千萬不能放棄,孩子只有我們,連父母也放棄,她便非常可憐. 事情總有出路的,也要接受她不會跟常人一樣.
我也是選擇儘量說出來,不會收收埋埋,夫家暫未能接受,我便在娘家說,一回娘家,我便大講特講,幸好我有一個好好的娘家,媽媽哥哥姊姊全部極度支持,為此而找書看,聽到電台講自閉症立即call我去聽,甚至問我是否需要金錢上的支持.其實經濟上我暫時還可負擔,不需幫忙,但這些行動及說話已令我非常感動.
所以別灰心,要積極面對,努力去找支持,不要一個人死頂呀.

作者: hystericland 時間: 09-8-7 02:40

原帖由 ChingMan1002 於 09-8-4 13:28 發表
我個囡14個月時被評為ｇｌｏｂａｌ delay, 大小肌慢了八個月, 認知慢了近九個月至一年. 而家排緊s位, 响政府同私家有做ot同pt. 經過大約一年既training, 係有進步, 不過好慢, 同同齡相差仍然好遠, 佢毎次training都喊, 唔多肯做, ...

千萬不要灰心啊!

作者: ChingMan1002 時間: 09-8-7 12:59

真係好多謝大家既支持,其實我都係掙扎左好耐先打之前編文比大家, 自從知道自己bb有問題, 自己都唔想&唔敢講出嚟比人地知(除非好friend la), 不過講出嚟又點呀, 你想人地點安慰你. 見佢地d bb細過我個個但個個都咁精靈,咁叻.... 心裡面少不免會唔開心. 所以, 我選擇左收埋. 可能同返差唔多情況既媽咪傾會明白d. 好似之前bb一歲生日, 响網上識左班朋友一齊攪生日會, 有些之前都有聯絡, 但當之後知道我個b有問題, 佢都已經無再搵我lu~~ 幾現實.
至於老公, 其實佢一直都好反對我使錢做咁多咩training, 成日話bb未到個個stage (因為佢去親training,playgroup都喊) 不過自從佢聽完醫院個教授解釋, 佢明白左d啦, 而家都叫無咁抗拒.
我好想响呢到可以認識多d媽咪, 大家交流下. 有興趣可pm我傾下計.

作者: cakev 時間: 09-8-7 16:14

chingman:

唔好灰心啦,嗰班mami唔明你啫,仲有我哋呀嘛,,,

我有个friend仲話我,''你個女唔識講嘢係咪我唔夠耐性同心机呀??呀边个邊个就唔同呢,佢个女咁乖就係因為佢点点点....又会咁咁....''聽完之後真係嬲到爆@@@

個個小朋友都唔同,你估我想我个女唔講嘢架,我用左十万倍耐性教佢,佢都唔開口,我都冇計架!!普通人点会明做一个特殊bb mami的苦況呀!!!!唯有眼淚向心裹流,對於那些不明你處境or惡言對待嘅人,避之避之......你唔想和我交往,我亦不願親近 bye bye,,,唔好影响我情緒tim bor

作者: owl_2046 時間: 09-8-7 17:59

係呀, 好多人都唔明白.

因我地囝囡望落去同普通小朋友冇分別, 有時甚至靚仔/女過佢地(我個仔就係

)所以都會將責任推係我地身上, 話我地唔識教仔.

幸好,我夫家及娘家都好明白亦好支持我.

老爺:金錢上支持

奶奶都好開通, 從冇怨過我地一句, 亦唔介意比人知亞仔既事...原來佢身邊都有朋友既親人有呢個問題, 重叫我地唔好擔心, 只要亞B有進步就可以, 慢D都唔怕...又成日叫我唔好喊.....無言感激....

父母, 姊妹弟..盡在不言中.....

我同老公都好快由"點解係我個仔"呢個困龍轉返出黎. 雖然心底深處仍然傷痛, 但日子一樣要過......與其抱怨, 何不化悲憤為力量呢!

亞仔而家每日都有D驚喜比我地, 好似琴晚老公同亞仔玩緊, 亞仔見到工人由廚房取送出黎, 突然爆句:食飯啦

原帖由 cakev 於 09-8-7 16:14 發表
chingman:

唔好灰心啦,嗰班mami唔明你啫,仲有我哋呀嘛,,,

我有个friend仲話我,''你個女唔識講嘢係咪我唔夠耐性同心机呀??呀边个邊个就唔同呢,佢个女咁乖就係因為佢点点点....又会咁咁....''聽完之後真係嬲到爆@@@
...

[ 本帖最後由 owl_2046 於 09-8-12 15:40 編輯 ]

作者: KSWKSW 時間: 09-8-11 15:01 標題: 回覆 3# ChingMan1002 的文章

你仔仔依家几大啊

作者: Reiki 時間: 09-8-11 21:58 標題: 回覆 13# ChingMan1002 的文章

2歲幾未識行,可能個問題相對言語未識講會大啲。而其他你話唔識的野,都跟小肌肉有關,所以阿女可能大小肌肉都較弱。而認知方面,要先改善專注力,而且可能係作為媽媽的,最有能力幫到孩子的項目。呢方面,靠唔倒姑娘。

你的問題,舌針的療效有機會快過training,其次針灸。至於濕疹,可能有食物敏感,同埋要留意塵蟎、日常清潔劑等都會令她痕。痕會影響她的學習情緒和表現。
不過,最重要係你個心要先calm down. 呢樣野,我時刻都在學習中。

作者: ChingMan1002 時間: 09-8-12 11:15 標題: 回覆 2# KSWKSW 的文章

小囡而家22個月大lu~~~

作者: ChingMan1002 時間: 09-8-12 11:32

呀囡禮拜一開始返私人s位, 我專登攞左半日假陪佢, 起初唸住佢全程都喊, 不過估唔到佢有d時間都無喊, 姑娘話佢喊係想扭抱, 唔想做野而已. 希望呢個課程真係幫到佢啦.

作者: ChingMan1002 時間: 09-8-12 11:45 標題: 回覆 3# Reiki 的文章

我遲些都打算同佢試針灸, 這是我唯一唸到有機會幫到佢既方法.

作者: cakev 時間: 09-8-12 16:13

chingman,

想問下你讀邊間私人s位呀？

我pm回覆咗你,keep in touch la

作者: Torres 時間: 09-8-12 22:52 標題: 回覆 11# cakev 的文章

hi cakev, chingman, 其他mami,

我一路睇妳地d post, 我就一路喊, 妳地完全同我一樣想法, 有一樣嘅感受!

"你個女唔識講嘢係咪我唔夠耐性同心机呀??呀边个邊个就唔同呢,佢个女咁乖就係因為佢点点点....又会咁咁....' cakev, 妳呢段說話我都有親身感受過, 我次次都覺得好難受, 好辛苦, 眼淚就不斷湧出來!

我同佢番一些playgroup, 所有小朋友都可以坐定定, 又可以完成老師嘅指令, 只有我個仔一個完全跟唔到, 當時d眼淚真係忍好辛苦!

我知道我一定要經過這個適應期, 要學習如何接受自己孩子&身邊所有評論! 我會同佢一起努力, 找多d訓練, 希望佢可以開開心心咁發展!

終於在這裡吐出我的心事, 終於有人明白自己感受, 希望大家一起努力!

作者: cakev 時間: 09-8-13 00:31

torres,

我都好開心係度揾到同病相憐嘅朋友可以傾訴下。你知la身邊的朋友雖然有啲都好好,会問候下亞b現在怎樣,但當中的過程係幾咁辛苦、辛酸佢地都係唔明,有時唔係話怪佢地,不過始終冇身同感受過,点同呀！

我個女歲半嗰時上playgroup咪又係咁,成班小朋友坐定定得佢一個四圍走,真係又尷尬又辛苦,加上有个'賓賓'老師對我个女唔多好,樣樣都係最尾先到佢玩,咁我咪上了一个月就冇返la。

我有時出街見到人地啲小朋友都会羨慕架 ,但返到屋企見囡囡叫佢錫返就好啲law haha。你話完全唔比較係好難嘅,只係知就算law,,,,,,,,

你個仔仔几大呀？有冇做過評估呀,得閒交流下la,,(亞女依家返學多左時間可以上網hehe)

作者: Torres 時間: 09-8-13 13:30

cakev,

我個仔歲半, 下星期去CAC見姑娘, 我都諗住早D再找私人評估, 大家對邁步or PRTA專門店, 有咩意見呀? 上網見到D人講如果做了臨床心理學家那種評估, 佢地會轉介你去社署排位, 起碼慳幾個月時間! 大家有冇經驗, 是否真係可以做到?

作者: cakev 時間: 09-8-13 16:04

TORRES,

以我所知去完CAC見姑娘仲要等成半年先可見医生做評估架。我都係一邊等政府一邊係邁步俾$做評估嘅(6月份嘅事)。費用$4000包括了refer排政府s/i/e位架啦,我覺得$4000省了半年至9个月值得。

至於prta我都有去過佢哋嘅免費評估,但我覺得都係step好啲,收費好似$6xxx左右(因那時已報了step所以冇問清楚)

我亦有个朋友最近係養和做左个全面評估,好似$7500亦包括refer排政府位。我出年都想帶b女去做,因為个friend話這個評估十分全面,包括大、小肌肉、感統、言語、認知、自閉傾向等都包括了ｏ

早啲評估早啲排位嘛(if really need),我就非常罕有地排左2weeks就叫我8月開學,真係又驚又喜(本來報讀左協康)！連幼稚園个主任都話我個女係收i位學生(佢嗰間)以來最細嘅。haha我生左亞女之後發覺很多嘢都係冇得plan,咁只好隨緣啦！

作者: Torres 時間: 09-8-13 23:29

cakev,

多謝你咁詳細解答, 我有打去養和問, 要$2000一個鍾(2-3小時左右應該完成) 我想問你是否在step做"自閉症診斷評估"(現在$5500)? 是否沒有大、小肌肉、感統、言語、認知等? 我現在都心大心細, 或者等下星期去完CAC再去決定找那一間!

不過我見你在STEP評估完, 再refer排政府位都好快, 因此我對STEP始終信心較大!

妳囡囡是否有明顯進步呢? 我估到帶著一個發展有問題的孩子一定比較辛苦, 不過, 當妳見到佢有些微進步, 一定是我們最大的鼓舞!

阿仔現在情況:

1.一個單字也未能講
2.從未用手指指東西
3.經常大叫大喊, 扭計, 大脾氣
4.有時玩車仔都愛反轉玩車轆, 很少會推車
5.不懂假想像遊戲
6.從出生至現在1.5歲, 只有十幾次一晚訓天光, 晚晚喊醒, 要食奶&拍
7.眼神接觸不太多, 很快就望開
8.情願幾日都唔飲水, 死都唔用學習柸(吸管), 只用奶樽飲水

而有一樣唔似, 就係佢好鍾意同大過佢的小朋友玩, 次次都好開心! 但其他各種問題都有點擔心, 現在我最想佢快D識講野, 起碼表達到自己, 唔洗成日咁蚊!

作者: ChingMan1002 時間: 09-8-14 09:34 標題: 回覆 1# Torres 的文章

torres, 你個小朋友既情況十足十我個囡咁, 不過佢就有eye　ｃｏｎｔａｃｔ．其實到而家都未ｃｏｎｆｉｒｍ到佢係咪自閉，　兒科醫生話有ｄ徵狀似但要大個ｄ先可評估，對於出面個ｄ評估，我覺得好貴呀．所以都未知做唔做好，下個月呀ｂ會照ｍｒｉ，到時唸住再問醫生．

作者: Torres 時間: 09-8-14 21:52

chingman,

係呀,評估真係好貴, 不過如果你已經排到排s位,同私家有做ot同pt, 咁都應該ok! 見兒科時再問下醫生, 是否須要做自閉証評估! 現在出面私人公司d評估服務多到不得了, 樣樣都好貴, 成千蚊一個鍾訓練, 如果唔係我地政府得咁少資源, 可能我地d小朋友唔會咁辛苦!

請問你有那間私人做訓練? 比些意見我, thanks!

作者: cakev 時間: 09-8-14 22:49

torres,

嘩乜step加價加得咁快嘅!做REFER去政府很快但排位其實一般要一年(係個社工講嘅),我個女咁快排到可能同我選嗰區有關(係嗰幼兒園主任講嘅)BUT 要幾耐我唸真係唔知架!

我B女現於尖沙咀上ST,進步了不少. 而家識發單字.
唔知係佢大過左, 定係戒奶, or DHA魚油.
佢而家eye contact好過之前好多.
以前望都唔望下.

作者: Torres 時間: 09-8-14 23:14

Cakev,

阿囡有進步, 真係好開心wor, 識發單字, eye contact又多咗, 絕對係我地好大鼓勵, 有少少進步都會勝過一切, 真係替你開心, 希望我遲d都有好消息分享

作者: cakev 時間: 09-8-15 14:15

torres,

唔記得講你知我係step做評估嗰時佢話我個女兩歲啱啱可以做'自閉症'評估,if under 2歲都可以做但係未必咁準,你打电話記得問清楚,費事side $ la.

我亞女嘅少少進步真係令我哋兩公婆好開心。自從佢開左'金口'之後脾氣叫做好左啲,以前係咪都大叫、喊,真係好無耐。仲記得佢22個月左右唔知做乜晚晚喊到收唔到聲,隔離屋投訢以為我哋做乜,call左'食蕉'哥哥上嚟添呀!!我唸佢哋以為我虐兒其實係亞女'虐待'緊我哋haha......仲記得老公同'食蕉'哥哥講'''亞b喊我哋都唔想,唔通叫我用膠紙貼住佢把口咩,我都想佢停但無辨法,sorry！！''

你都快啲幫囝囝揾st training,我個人認為真的有幫助,,希望好快到你仔仔出聲啦！

作者: Torres 時間: 09-8-16 00:55

Cakev,

我今日去咗poly復康診療中心做了初步評估, 因為自己好心急去找training, 見到佢地又好平$380(45mins), 咁不如試下先!物理治療師問了一些問題,又同佢玩了一陣子, 都覺得阿仔有自閉証, 但不是太嚴重!

其實我們都決定星期二去完cac見完姑娘, 睇下佢會唔會比到少少意見, 之後就book"step"做自閉証評估! 妳都講得啱, 如果2歲以下可能會無咁準, 但如果可以用佢個report排政府, 又一定要靠佢! 我都好頭痛, 如果比左幾千蚊, 又排唔到, 咁就真係好慘!

我都煩緊找st比佢, 我又排緊links的小組訓練, 心橋同協康都排緊綜合訓練, 不過全部都要等, 真係唔知可以先做d咩! 如果找st私人訓練,間間都要成$800(1hrs) 真係好貴好貴, 如果佢仲要坐唔定, 其實一個鐘training, 係咪真係可以幫到佢呢?

妳隔離屋投訢? 有冇搞錯,係人都知bb仔成日都喊架啦, 佢一定沒有經驗喇, 算啦, 身邊太多人唔明我地!

我期待咗阿仔叫我一聲mama好耐喇, 幾個月之前我地仲成日覺得, 呢個仔係懶定係自己唔夠勤力教好佢呢? 一個月又一個月咁過, 到近日終於明白, 完來佢唔係懶而係有發展問題! 其實我個心真係好驚, 個評估答案真係"自閉証" , 就算現在有幾多心裡準備, 我估我到時都係好難受好傷心! 終於明白做左人父母之後, 真係唔容易!

作者: January 時間: 09-8-16 06:22

剛好路過, 我都係同路人. 我仔仔3歲8個月喇. 我舊年八月做評估, 之後開始返小組, st, ot又返緊i位.
回想之前一年, 時間真係過得好快.

我覺得訓練要趁早, 自己小朋友係吾係自己都心中有數, 評估都自係比自己個交待去接受現實同去排政府訓練. 所以最仲要係了解小朋友問題係邊同要咩訓練.

我仔仔由吾多望人, 坐吾定, 吾理人, 手腳慢, 吾識跳, 吾識企係度小便.... 我同我老公每樣野分層分次教佢. 我地個小小目標就係想佢有基本能力做起.

我最開始既時候, 狂報課程比佢, 又協康小組, 又step小組, 又私人專注小組, 又一對一st, 一對一ot, 每一個月既糧都用盡晒.....當時都好灰, 又頻撲. 兩公婆又要返工, 我地兩個+工人, 去完呢度又去果度上堂. 買晒d書返來睇, 又去堂又聽講坐. 見到朋友既小朋友又話學畫畫又話英文音樂phonic, 又要讀邊間學校.....而我地只係狂幚佢打好底, 吾理其他人做咩. 我地過左新年之後因為太辛苦所以慢慢將d訓練減出來, 而家只係返隔星期一對一st, ot小組. 將時間來帶佢出去玩下. 我地幾乎每星期都出動, 去沙灘, 去郊外, 咩地方都去玩. 但每一日仍然有家居訓練, 佢無退步, 相返偶然都有小驚喜. 結倫係太多課程未必幚到手, 反而另到一家人+小朋友好疲憊.

小朋友既盡步真係好睇父母既付出. 吾好太靠出面既訓練, 有i位有e位都吾係等如自己吾駛做. 佢地只係教你做, 比你知道小朋友要做咩訓練. 我地落手落腳先有用.

加油呀, 大家多d交流下.

原帖由 Torres 於 09-8-16 00:55 發表
Cakev,

我今日去咗poly復康診療中心做了初步評估, 因為自己好心急去找training, 見到佢地又好平$380(45mins), 咁不如試下先!物理治療師問了一些問題,又同佢玩了一陣子, 都覺得阿仔有自閉証, 但不是太嚴重!

其實我 ...

作者: Torres 時間: 09-8-16 18:16

january,

睇完你個post, 我真係好感動, 多謝你給我一些鼓勵!有你們些班同路人, 我的確多了信心, 就算那一天來臨, 我都可以振作!

冇錯我地兩夫婦都心中有數, 跟住落嚟嘅日子應該好忙好辛苦, 要好努力同佢一起訓練! 我聽完你講, 我會特別係家居訓練付出多些, 希望好似你仔仔咁, 快d有進步!

多些再交流, 我會加油! thanks

作者: Jac0501 時間: 09-8-17 13:45

各媽咪好!
我都是同路人,我仔仔有自閉症,現在已4歲10個月,回想2年半前得知他有自閉症時,我都有很不開心的時間.我覺得你們已做得很好,我們作為家長,一定要面對自己小朋友的問題,一起努力.
我得知小朋友的問題後,給他安排上綜合訓練,社交小組,語言治練,現在則按他的需要,安排了物理治療.職業治療及感统的小組給他.雖然有了他之後,我變得好忙,但是每一次看到他有改進,我便覺得一切都是值得的.我很同意January所說的家居訓練,回想小兒以前做練作,我和他做一些簡單的線條練習,做到我想死,但我們沒有放棄,他現在已可以自己寫字.數月前,他還不可以一步一及下樓梯.單腳跳及拍球,我們近三個每天和他一起做,他現在已可以自己做到了.不要低估自己的能力!
各媽媽一起努力.加油!

作者: ahjoechan 時間: 09-8-17 14:22

簡直係我的心聲......我都好enjoy同仔呢到去, 個到去, training 太多.我又要返工,我自己都好倦, 邊諗到咁多training .....好有壓力, 逢weekend好想玩下, 我同自己講, 當係環境教育.......

作者: faithmum 時間: 09-8-17 19:33 標題: 回覆 5# Torres 的文章

hi torres,
我是路過的。很同意cakev的講法 "你都快啲幫囝囝揾st training,我個人認為真的有幫助！"

我唔想浪費小朋友的時間，唔厘咁多，未證實都搵咗st 做治療，當時周圍搵，不過一係要等好耐﹐一係貴到死，好彩搵到個價錢合理又上門的st，一早開始做，一直keep 住做，都好有用。回想就算佢唔係自閉，語言社交同其他小朋友都唔同，唔洗等晒d報告出先開始做，所以一心去搵，周圍問，現在都有個着落｜希望你都快d開始，盡快俾b有幫助!

作者: ChingMan1002 時間: 09-8-18 09:39 標題: 回覆 10# Torres 的文章

其實我個囡未排到政府架, 都唔知要等到幾時, 而家係links讀緊私人s位, 另外,响協康做緊職業治療, 不過改左一個月一次, 政府醫院做物理治療, 一個禮拜一次, 同埋一對一既個別training. 因為佢落後人地成年, 所以真係好擔心, 為左個囡, 最近仲連樓都賣埋, 住响奶奶到.

作者: ChingMan1002 時間: 09-8-18 09:41 標題: 回覆 2# faithmum 的文章

可否pm我st既資料呀, 我都唸緊幫個囡搵st. 謝謝!

作者: faithmum 時間: 09-8-18 14:18 標題: 回覆 1# ChingMan1002 的文章

Ｈｉ　ＣｈｉｎｇＭａｎ，　好的。不過如果你的Ｓ位已經包了足夠的ＳＴ　ＴＲＡＩＮＩＮＧ，　咁就唔洗再揾。除非唔夠或唔好啦。

作者: Torres 時間: 09-8-18 21:11

名位媽媽

多謝你地支持同埋意見, 今日去了cac見姑娘, 當然都係答我" 六個月內會再call你評估"
我地已經book了step下星期做"自閉証評估", 希望個report有咁快得咁快排位啦!

chingman,

links嘅st要成$800(1hrs), 你覺得如何? 有冇去過其他比較過?

faithmum,

可否pm我st既資料呀, 謝謝!

作者: ChingMan1002 時間: 09-8-18 23:52 標題: 回覆 1# Torres 的文章

我B係响LINKS讀學習基礎小組, 當中有言語治療, 佢只係返左一個禮拜學, 所以唔知佢地既ST好唔好呀, 不過佢返左學之後多左D發音, 成日叫爸爸, 呀爸,呀姐, 但係亂叫LAW. 即係對住D陌生人都叫呀爸, 比佢激C.

作者: Torres 時間: 09-8-19 13:41

Chingman,

佢肯講爸爸都好過我阿仔, 一個字都講啦! 我都在links排緊言語小組訓練, 又要等lor!

作者: ChingMan1002 時間: 09-8-20 09:30 標題: 回覆 1# Torres 的文章

但係通常仔係慢d架嘛, 响links返學既學生好似大多未識講野, anyway, 加油呀!

作者: ChingMan1002 時間: 09-8-20 09:32 標題: 回覆 1# Torres 的文章

但係通常仔係慢d架嘛, 响links返學既學生好似大多未識講野, anyway, 加油呀!

作者: hcily 時間: 09-8-20 14:09

我也很同意January的話,不能完全依賴外面的訓練,始終孩子待在家的時間最長.
我從兒子19個月起每晚跟他在房中坐定定做訓練,起初沒方向,只是玩一圖形遊戲,總之要令他坐定定,由5分鐘慢慢至30分鐘,訓練內容也隨著我學多了方法 (從協康姑娘及st那裡學)開始多元化. 他同時也上協康的playgroup. 到現在上幼兒班,他很容易便適應了,完全沒有喊. 不過當然,他還是會遊魂的.
我們也是weekend帶他四處去玩,去機場看飛機,去游水,雖然累,不過很開心.
所以我想父母給予時間是很重要的,我們也是雙職父母,只能儘力抽空陪他.

作者: Torres 時間: 09-8-22 23:34

原帖由 ChingMan1002 於 09-8-20 09:32 發表
但係通常仔係慢d架嘛, 响links返學既學生好似大多未識講野, anyway, 加油呀!

links打電話給我, 有位上言語小組, 下星期開始喇, 唔知有冇機會撞到呢?

作者: ChingMan1002 時間: 09-8-23 00:32 標題: 回覆 1# Torres 的文章

咁咪好LAW, 咁快就排到, 不過可能LINKS無咩人識, 所以排得快D, 希望你個小朋友快D有進步喇. 不過我唸撞到既機會都好微, 因為我要返工, 平時都係工人帶佢去.
而家我個囡好難攪呀, 以前拖住佢都肯行, 而家無論响屋企定學校一要佢行就喊, 死都唔肯行, 軟哂坐响地, 用奶樽餵佢飲水, 捉佢隻手拎, 佢點下就縮開手, 之後餵佢飲佢就驚我地又迫佢用手拎所以唔肯飲水. 我覺得而家越係迫佢做, 佢就更加抗拒, 都唔知點算.

作者: nokia6300 時間: 09-8-23 15:09

dear all mami,

my boy is now 16-mths and hv the same problems with yr bbs, i want to know the information of LINKS, i can't search anything fm yahoo, pls send me info, many many tks and wish all our bb can good health ^^

add oil mamis

作者: cecilylsm 時間: 09-8-23 16:29

Nokia6300,

Type "領思兒童發展中心", then u can find out this Co's info.

原帖由 nokia6300 於 09-8-23 15:09 發表
dear all mami,

my boy is now 16-mths and hv the same problems with yr bbs, i want to know the information of LINKS, i can't search anything fm yahoo, pls send me info, many many tks and wish all our ...

歡迎光臨教育王國 (/)