K2 社交問題/ 言語理解能力

msconniehk

近日有點氣餒，抱歉長文少少，小朋友剛剛K2轉校，之前係讀國際style happy School，7月尾收到有間傳統嘅local學校收咗插班，唔駛錢，所以轉讀咗個半月，本身女女由18個月起有上私人training嘅，嗰陣時私人評估話有自閉symptoms, 建議盡早training 介入，用左好多錢，上Aba/ 言語治療，到三歲排到E位上綜合各訓練到而家，自費再加言語治療，年多dd, 個人覺得佢比前進步咗好多，由當初少眼神接觸、唔講嘢呢到而家好多嘢講，但係理解嗰度確係有問題！有時問A答B, 而社交嗰度呢睇得出她好想同小朋友玩，主動say hello! 但係好似唔識相處咁，有時講嘢啲語氣呢又怪聲怪氣，想玩人哋玩緊個玩具呢，人地唔借就喺度大喊，嚇死人呀，係我都唔鍾意啦！所以新校老師上星期聯絡話佢識唔到朋友，班裏面係「隱形人」同埋國語老師話佢冇靈魂，聽到都心傷！

我呢個星期好努力同佢去公園玩（本身有trainings 又有少少興趣班學），大家都累，但深信公園係免費嘅社交學習渠道，努力帶她去，帶埋吹波波，但係都眼見過佢兩次俾人拒絕同佢玩，個樣好唔開心…我努力都幫她手識咗一兩個見咗幾次諗住係新朋友啦，之後睇佢做化…但係昨天落去人哋都唔想同佢玩啦，唉！佢有時又鍾意拖住人隻手，人哋開頭比拖，但有時候人地唔想都唔鍾意，唔like一定，一係就黐住嗰個朋友，死跟…人地又覺得你怪…而家老師叫我幫佢搵啲社交班同埋言語治療，話如果我上咗年幾E位是「唔得囉」(emoji)本身有上言語治療既，一個月三堂左右，咁她話唔夠，要再密集啲，其實本身一堂都$1100 (emoji)E位度一個月一堂，早兩年嗰個私人重$1300堂tim) 真是用好多錢，心都累～ 呢啲真係同路家長先明白！

今年她七月排到去CAC 評估理解力弱、有點專注不足，需要繼續上言語治療，而家睇緊協康、聖雅各福群會的社交班，唔知大家有無咩港島區好介紹呢？(emoji)(emoji)(emoji)(emoji)又或者能教導她的社交貼士謝謝！

afterall

msconniehk 發表於 24-10-29 09:15
近日有點氣餒，抱歉長文少少，小朋友剛剛K2轉校，之前係讀國際style happy School，7月尾收到有間傳統嘅loc ...

老師話佢識唔到朋友，咁老師可唔可以安排一兩個‘小天使’同學同佢做好朋友幫助佢融入群體？

msconniehk

afterall 發表於 24-10-31 07:59
老師話佢識唔到朋友，咁老師可唔可以安排一兩個‘小天使’同學同佢做好朋友幫助佢融入群體？
...

她冇講過，我可以問吓佢，她話上一次我個女好熱情咁是都要拖住某個同學隻手，人哋怕咗佢，走出嚟搵老師求救，唔要同她一組，佢就同我個女講「而家人哋唔同你一組啦，你自己搵個第二個啦」跟住我個女當堂眼濕濕。 我已經不斷教佢呢唔可以唔問人或者不斷拖住人隻手，人地可能唔鍾意的。或者會整痛人～希望佢明白啦

campbell

msconniehk 發表於 24-10-31 08:07
她冇講過，我可以問吓佢，她話上一次我個女好熱情咁是都要拖住某個同學隻手，人哋怕咗佢，走出嚟搵老師求 ...

呢間學校有冇i位？排i位吧
點解老師應對咁奇怪，好似冇咩經驗

msconniehk

campbell 發表於 24-11-2 07:01
呢間學校有冇i位？排i位吧
點解老師應對咁奇怪，好似冇咩經驗

學校只有O位，本來係想遊說我排O位，但都要等下年有K3 同學走先有位，我講返我上緊E位，而我會自己跟返，相信不比O位差，而她也說上嘅堂數大家也差不多，所以就不迫我轉排O位，而家就叫我加多啲budget參加啲社交班同言語治療班密集啲lol.

chun719

msconniehk 發表於 24-11-5 08:09
學校只有O位，本來係想遊說我排O位，但都要等下年有K3 同學走先有位，我講返我上緊E位，而我會自己跟返， ...

e位一定比o位好。
你話佢多野講 , 但言語治療想增加?

佢而家e位協康 , 協康點評估佢?
你覺得小朋友最大問題係咩?
如果你本身E位 , 協康自己既活動入面有冇認識到一樣需要做訓練既小朋友
當中會有啲好被動既小朋友，正正需要你呢種主動既小朋友。
本身國際學校既小朋友都比較熱情啲
佢轉校一定會有唔習慣既地方。

msconniehk

chun719 發表於 24-11-8 11:47
e位一定比o位好。
你話佢多野講 , 但言語治療想增加?

言語治療要增加係因為佢理解能力有問題，呢兩星期我每晚同佢睇多咗圖書，問返佢問題都覺得佢有時問非所答，好似唔明我講乜，或者係咪唔專心冇聽到，我覺得佢最大問題就係呢一方面同埋社交囉，昨天帶她公園本來都好好地識到啲朋友仔一齊玩，但當要爬一個好高嘅樹，爬左上去佢突然間驚就喺度大喊，我點拉佢落嚟都拉唔到，搞到其他小朋友都唔敢再同佢玩，跟住佢整日嘅情緒都唔好，之後夾一個小朋友上OT 都喺度搞搞震，有啲唔合作(emoji)， 我都第一次見，我都好希望幫佢改善情緒呢度～

chun719

msconniehk 發表於 24-11-9 10:53
言語治療要增加係因為佢理解能力有問題，呢兩星期我每晚同佢睇多咗圖書，問返佢問題都覺得佢有時問非所答 ...

當佢問非所答既時候你既情緒係點? 點處理?
當佢爬到好高驚既時候你點處理?
當佢成日情緒唔好你點處理?

msconniehk

佢問非所答嘅時候我就不斷嘗試引導嘅～

佢爬到好高嘅時候大喊呢，我就嘗試叫佢返落嚟，但係佢唔肯不斷大喊、我就不斷話唔緊要，我哋落嚟之後再試，但佢都唔肯落返嚟，我就最後夾硬抱返佢落嚟～晚上食飯，我嘗試引到佢問點解今日唔開心，佢話公園爬樹唔開心，但我問仔細啲點解唔開心佢答唔出！

佢情緒唔好嘅時候，我都有講過「我唔敢帶落公園呀，你成日喊，啲小朋友怕咗你！」我都有覺得gum講係咪唔好呢？

chun719

msconniehk 發表於 24-11-11 12:05
佢問非所答嘅時候我就不斷嘗試引導嘅～

佢爬到好高嘅時候大喊呢，我就嘗試叫佢返落嚟，但係佢唔肯不斷大喊 ...

試下少啲否定，多啲認同。
唔好令佢覺得落公園有機會比你話佢，令佢唔想去公園。
喊唔緊要，每個人都有情緒，靜靜等佢喊完，話比佢知你都有驚既時候
我地下一次係可以試下點樣解決。
有時候佢專注唔到係因為前庭，係屬於職業治療師方向。
有冇比佢玩千秋?

覺得你做得幾好嫁啦

加油呀

msconniehk

chun719 發表於 24-11-12 11:13
試下少啲否定，多啲認同。
唔好令佢覺得落公園有機會比你話佢，令佢唔想去公園。
喊唔緊要，每個人都有情 ...

謝謝你！昨天再落公園半個鐘，佢有自己主動再嘗試爬嗰舊嘢，不過矮啲今次，我不斷鼓勵佢，佢最後爬到我都有讚佢，佢個樣都表現得好開心，我都知呢啲要慢慢嚟，會再努力，有時都有玩千秋嘅，但唔算多囉，佢好似興趣不大，謝謝你嘅意見❤️

crystal媽咪

msconniehk 發表於 24-11-5 08:09
學校只有O位，本來係想遊說我排O位，但都要等下年有K3 同學走先有位，我講返我上緊E位，而我會自己跟返， ...

原來你小朋友入咗一般幼稚園

咁就解釋到點解老師好冇經驗去幫小朋友手去融入